CBI-ah inlungrual; mahse…

“Indian Air Force (IAF)-in Lengpui ram an lei dan chungchangah dan bawhchhiatna nasa tak leh corruption a awm ngei nia lang hi, Mizoram mipui duh dan leh beisei ang ngeiin Central Bureau of Investigation (CBI)-in an chhui chhuah thuai theih nan Mizoram sawrkarin rang taka bawhzuiin hma la nghal rawh se.”
Hei hi nimin Assembly Session kal meka Dr R. Lalthangliana Resolution put luh a ni. Ruling member leh Opposition member-te hian inlungrualna an nei a, chu chu ‘CBI-in chhui se’ tih chinah a ni a, Lengpui ram lei chungchangah erawh thiam chang zawk nih an inchuh nasa hle.
Kan hriat angin hemi chungchang hi CBI chhui tura tihfel tawh ni mah se, chhui chhung hian hun a duh rei deuh tura ngaih a ni a, kan hma lawkah inthlan hmachhawn mai tur te a lo awm bawk nen, CBI nghah pahin mipui laka insawifihlim emaw, insawithiam emaw hi a pawimawh riau a nih hmel.
Ruling lamin sawrkar hmasa (MNF) chu bul lo tantu an nih thu an sawi a. Kum 2019 July ni 15 atanga Command Air Defence Officer-in Mizoram revenue secretary hnena lehkha a rawn thawn thu te, thil pali, survey map, non-encumbrance certificate, NOC leh a ram man tur zat an rawn ngen thu te, lehkha subject-ah ‘land acquisition/outright purchase’ tih a nih thu te, a tir atangin defence ministry-in a ram chawpa lei a, neitu nihna chawpa neih tumin hma an rawn la tih a chian thu te, khatih laia sawrkarin outright purchase an hnialna a awm loh thu te an aupui a. Sawrkar hmasa chu a bul tantu, engkim peihfel sa veka hnutchhiahtu, an ti a ni ber.
Opposition lam ve thung chuan sawrkar kal mek (ZPM) chu preliminary notification pechhuaktu, SIA exempt-tu, final notification pechhuaktu, award publish-tu leh pawmtu, compensation sum diltu leh pechhuaktu, ram neitute hming veka award siam ni si, an account-a pawisa lut si lova, midang hnena sum lut daih si chu ‘eng vang nge? tiin zawhna an siam a. Thil fel lo a tam em em a, Scam lian tak a awm, a zahthlak, an ti ve thung a.
Mipui lam chuan tu zawk nge dik a, tu zawk nge dik lo tih hi kan zu hre pha ta hauh lo mai a. Mipuiin thudik an hriat hi an right a ni, an ti ve ve si a. CBI chhuina final result a lo chhuah hma chuan, mipui lam chuan a lehlam lehlam thu kan buk tawn thin ang a, rinthuin kan kal ve mawp mawp mai dawn tihna a ni ta ber awm e.
He thilah hian, ram leina pawisa dawnna tura lehkha pawimawh vir vel danah thil dik lo a awm ang tih a rin theih a. Sawrkar laipui leh State sawrkar indawrna kara mimal mi pakhat kuta cheng vaibelchhe za tel a lut daih mai pawh hi, layman tan pawh ‘dik lo chu a awm ngei’ a tih ve theih nghal mai awm e.