CBI-in Manipur mi 6 thiamloh chan tir

Manipur-a chi leh chi inkar buaina avangin kumin May thla khan hmeichhiate chungah mawi lo taka khawsak niin hmeichhe pakhat phei chu pawngsual a nih bakah mipui hmaah saruak ngalngata sawisak leh chaih phar an ni a.
Central Bureau of Investigation (CBI) chuan October 16, 2023 -khan he thil thlenga inhnamhnawih misual parukte chu thiamloh chantirin Special Court, Guwahati, Assam-ah report a thehlut a ni. CBI chuan Indian Penal Code (IPC) hnuaia dan bawhchhiate hrem theihna dan hrang hrang te tlawhchhanin – Hnam tlem zawkte leh hnam hnufual zawkte venhimna (Schedule Caste and Schedule Tribe, Prevention Act) bak ah inphiarrukna te, a huhova bitumna te, ralthuam nena buaina siam te, hmeichhe pawisawilo chunga hleilenna leh rawng taka pawngsual tihte tlawhchhanin thiamloh a chantir a ni.
He pawi khawihna chhuitute chuan central sorkar hriattirna chhuah ang leh Manipur sorkar phalna angin First Information Report (FIR) siamin a thehlut nghal a.
He pawi khawihna hi June 21, 2023 khan NSK Police Station, Thoubal District, Manipur-ah thubuai ziah luh a ni a. He buaina chhuitu te sawi danin May 4, 2023 khan Manipur, Kangpokpi District-a B. Phainom khuaah ralthuam siam chawp nia rin keng mi 1000 velin he khua hi luhchilhin he khuaa cheng mipuite an that a, hmeichhiate pawngsualin in te an hal a, bungrua tamtak an tih chhiat thu an sawi bawk a ni.