Celta Vigo-in Benitez an ban

Thla kua pawh an chhawr tlin hmain RC Celta Vigo chuan an manager chhawr lai Rafael Benitez an chawlhtir
January 2016-a Real Madrid a chhuahsan hnuah Celta Vigo hi Spanish football-a Benitez-a kirleh hmasakberna niin, nikum June ni 30 khan Celta boss ni tura lakluh a ni a; league match 28-a vawinga chiah a team thar a chakpui hnuah an petchhuak zui ta a ni.
Liverpool leh Chelsea boss hlui Benitez hi tunah kum 63 mi ni ve tawhin, ban a nih laiin Celta Vigo chu Spanish top flight-ah 17-na an ni a, point hnih chiahin relegation zone an lut lo!
January 2022-a Premier League club Everton-in an ban hnu khan hna nei loin a han awm ren rawn a, chutah Celta Vigo chuan senglutin, inelna hrang hrangah Celta chu game 33 a khelhpui hman a, chuti zat game-ah chuan vawikua chiah team a chakpui a, chu’ng zinga vawithum chu Copa del Rey lama division hniam zawk team an tum tumin a ni nghe nghe.
Tun Pathianni kalta mai khan a club hlui Real Madrid lakah sili faiin an tlawm a, kha kha Celta a chetchhuahpui tawpna a ni ta a ni.
Celta Vigo hian kartawp Pathianni zan La Liga match pakhatah Sevilla an luhkhug dawn a, manager tharin team a enkawl hman dawn em hriat hman a ni rih lo.
Benitez hian Liverpool kha 2005 Champions League leh 2006 FA Cup title lakpuiin, Chelsea boss nghet lo a nih laiin 2013 Europa League-ah a champion-pui bawk.
2016-17 season-ah khan Newcastle United chu Championship atangin top flight-ah a kaipui a; a career-ah Valencia, Inter Milan leh Napoli a enkawl tawh bawk.