Celtics an chak ve ta
Pathianni zing khan NBA Conference play-off semi-final khelh chhunzawm a ni a, New York Knicks laka vawi hnih tlawm zawn tawh Boston Celtics chuan hnehna an chang ve ta nge nge. Inkhel dangah Timber Wolves in hnehna an chang a, series ah hma an hruai let ve bawk.
Champion lai Celtics hian mikhual an nihna hmunah bul an tan tha a, quarter khatnaah point 16 ngawtin an chungnung nghal. |ha taka bul an tan vangin an phur a, quarter hnihnaah khel tha chhunzawmin point 9 in an chungnung zui leh a, point 25 zeta hmahruai chungin chawlhlawk an hmang.
Chawlhlawk hnu lamah mualneitu Knicks in an khingpuite lehthal nawn leh ngei tumin tan an khawh nasa hle naa an game erawh a kang hleithei meuh lo. Knicks hi quarter thumnaah point khatin an hnufual zui leh a, an dinhmun a chhe tawh hle. Semi-final hmasa pahnihah hnufual zawk ni reng mah se Knicks hian Celtics lehthalin hnehna an lo chang zawn tawh a, semi-final thawh thumnaah pawh an khingpuite lehthal leh ngei an tum hle. An mualah chak tumin tan khawh viau mah se Knicks hian an mikhualte an lehthal thei tawh lo thung. Quarter hnuhnung berah point liin chungnung bawk mah se Celtics lakah hian point 115-93 in an tlawm ta tho thung.
Knicks lakah an chak vangin Celtics hian Eastern Conference final luh beiseina thar an nei a, Series ah 2-1 in hnufual mek mah se an dinhmun a la chhe bik hran lo. Knicks laka an chak tum hian Celtics tan Payton Pritchard chuan point 23 a thawkchhuak a, Jayson Tatum chuan point 22 thawkchhuak in, Knicks tana point thawkchhuak hnem ber Jalen Brunson chuan point 37 a thawkchhuak ve thung.
Pathianni zinga inkhel dangah Minnesoti Timberwolves chuan an khingpui Golden State Warriors an hneh nawn leh a, series ah 2-1 in hma an hruai.
Golden State Warriors hian semi-final thawhkhatnaah hnehna an chang nghal a, an phur hle. Semi-final thawhkhatnaah chak nghal mah se an pluer pawimawh Stephen Curry inhliam zui thung. Curry tel lova inkhel an hmachhawn pahnihah an tlawm zawn a. Semi-final thawh thumnaah point 102-97-a an tlawm vangin series-ah hnufual zawk an nih phah ta a ni.