Celtics in tlak an hnaih

May 13, Thawhlehni zing khan NBA Conference play-off khelh chhunzawm a ni a, New York Knicks lakah an tlawm leh vangin champion lai Boston Celtics in tlak an hnaih. Celtics rual hian Golden State Warriors pawh series ah 3-1 in an hnufual a, tlak an hnaih ve bawk.
Eastern Conference semi-final ah Boston Celtics an vanduai thei hle a, chak ngei tura ngaih an nih tawhnaah vawi hnih ngawt an tlawm a. Thawhleh zingah pawh quarter tawp ber an tan thlengin point 14 zetin hma hruai bawk mah se tlawm zawkah an tang leh ta tho a. An khingpuiten an lehthal zel vangin tlak an hnaih deuh deuh zel. Series-ah 3-1 ngawta an hnufual tawh bakah an player pawimawh Jayson Tatum a inhliam bawk si a, Celtics future a bright lo hle.
Game hmasa pahnihah an tlawm zawn hnuah game thumnaah hnehna chang ve ta hram Boston Celtics hian New York Knicks lakah bul an tan tha nawn leh a, quarter khatnaah point 11 zetin an chungnung nghal. Quarter khatnaah khelh tha viau mah se quarter hnihnaah erawh an inhnehtawk ta hle thung a, point 23 ve ve thawkchhuakin chungnung zawk an awm thei lo. Quarter hnihnaah chungnung zawk awm thei lo mah se Celtics hian point 11 laia hmahruai chungin chawlhlawk an hmang.
Chawlhlawk hnu lamah Knicks in an mikhualte lehthal ngei tumin tan an khawh nasa hle a, quarter thumnaah point 14 ngawtin an chungnung ta mai a, an khingpuite an lehthal chiah chiah. Quarter hnuhnung berah chak zawk nih tumin tan an khawh zui nasa viau a, Celtics in bul tan tha bawk mah se a tawp an khar tha zo lo nawn leh a, an khingpui ten an leh thal nawn leh a. Inkhel hmuhnawm takah hian New York Knicks in 121-113 in hnehna an chang a, final an hnaih leh zual sauh. Knicks hian champion lai Celtics hneh a conference final lut turin game khelh hmabak pathum la awmah vawi khat chak chiah an mamawh tawh. Hetihlai hian an trophy kawl mek humhim thei turin Celtics hian vawi thum chak zawn an mamawh tawh thung a, an hmabak a hautak tawh hle.
.Knicks lakah a vawi thum nan an tlawm tum hian Celtics player pawimawh Jayson Tatum chuan point 42 zet a thawkchhuak a, a chetha hle. Knicks lakah chetha viau mah se quarter hnuhnung berah a inhliam a, wheelchair hman a ngai hial. Tlak an hnaih tawh viau chunga an player pawimawh Tatum a inhliam leh tak zel vangin Celtics in tlak an hnaih leh zual phah sauh nia ngaih a ni.
Thawhleh zinga Western Conference semi-final thawh linaah Minnesota Timberwolves chuan Golden State Warriors lakah a vawi thum nan hnehna an chang a, final lut turin vawi khat chak chiah an mamawh tawh.
Series ah 2-1 a hmahruai mektu Timberwolves hian Golden State Warriors hi point Golden State Warriors thanks to a 117-110 in an hneh. Warriors tan an player pawimawh Stephen Curry an inlan thei lo chhunzawm zel a. Curry awm lo hi Warriors in an tuar hle. Semi-final game hmasa berah hnehna chang nghal mah se Curry tel lova an khel hnuhnung pathumnaah an tlawm zawt ta tlat a. Final lut zo lovin tlak an hnaih sawt hle a ni.