CEM leh MLA ni kawp hnenah ban anih loh chhan tur zawt

Chakma Autonomous District Council-a member ni chunga MLA inthlan hnuhnung bera MLA atana thlan tlin ni bawk Rasik Mohan Chakma chu dan tlawhchhana MLA atanga ban a nih loh chhan tur sawifiah turin State Legislative Assemly speaker Lalbiakzama chuan hriattirna a pe.
2024 March 22 khan Assembly speaker hian RM Chakma hnenah hriattirna hi pe in, CADC-a MDC pakhat Doymoy Daveng Chakma chuan complaint a thehlut a. Article 4 of the schedule of The Mizoram Union Territory Legislature Members (Removal of Disqualification) Act 1975 hnuaiah Autonomous District Council-ah chief executive member, executive member, chairman, vice chairman nihna leh Mizoram Legislative Assembly member nih kawp theih a nih laiin, The Mizoram State Legislature Members (Removal of Disqualification) (Amendment) Act 2006 ah chuan nih kawp theihna dan chu paih a nih tak avangin, CADC-a CEM ni mek RM Chakma pawh dan siamthat zawk hmang hian MLA a nihna atanga ban theih a ni tih, a thlen a ni.
He dan siamthat hmanga MLA a nihna atanga ban a nih loh chhan tur hi speaker hian 2024 April 15 ralhmaa ziaka sawifiah turin Tuichawng bialtu MLA RM Chakma hi a hriattir a ni.
RM Chakma hian dan bawhchhiat a neih loh dan hi speaker hnenah hian thlen a tum tih a sawi a ni.