Central lam dawr danah kan indang lam hleih hle – MBJP president
Mizoram sawrkar official-te leh BJP Mizoram hruaituten central hotute an dawr danah a indanglam hleih hle a, state sawrkara an thawhpui loh a lang hle tih BJP Mizoram president Vanlalhmuaka chuan a sawi.
BJP Mizoram-in state pum huam membership drive campaign a neih turah Inrinni khan party mite hriat tur inhrilh a ni a. Hei hi India ram pum huapa kalpui tur niin, Membership Drive Campaign-2024 state incharge Dr Rajdeep Roy leh BJP Mizoram State incharge Devesh Kumar ten an rawn hmanpui.
BJP State president Vanlalhmuaka chuan, Mizorama membership drive campaign an neih turah hian BJP thlawptu apiang leh member ni tawhte pawh a thara inziahluh leh tur a ni tih a sawi a. BJP-in an data an hriat duh avangin hetiang hun hi neih thin a ni tih a sawi.
Tunhnaia Union minister thenkhatte Mizoram hmasawnna tur leh mamawh nia an hriat an thlen chungchang sawiin, “Kan indawr dan leh BJP ni lo sawrkar official-te indawr dan chu a dang hle. Mizoram mipuiin thuneihna min pek loh avang leh state sawrkar nen kan thawh ho loh avangin hma lak thui erawh har tak a ni a, nimahse, mipui mamawh hmasawnna thlenna turin BJP Mizoram chuan hma a la zel dawn a, tuna Mizoram harsatna hi sutkian a nih theih nana hmanraw kawltu leh neitu chu BJP hi kan ni,” a ti.
Membership drive chungchang sawitu Dr Rajdeep Roy chuan, BJP chu khawvela political party mala member ngah ber a ni a, India ramah vaibelchhe 18 vel member an ni mek tih a sawi. Mizoramah a tam thei ang ber BJP-a inziaklut turin hma an la ang dawn tih sawiin, “Silchar-a awm ka nih vangin Mizo thiantha leh hmelhriat tam tak ka nei a, Mizo doctor thiantha tam tak ka nei bawk. Medical doctor nia mipui rawng ka bawlnaah Mizo, a bikin Kolasib thlanglam zawng phei chuan min hre nual hlawm anga, Mizo mipui thiantha tak tak BJP Mizoram-in membership drive a neih hunah pawh PM Modi hnathawh miretheite chawikanna hrang hrang Mizoramah ngei kan chhawr mekte tun aia chak zawka hma lak a nih theih nan BJP member-a inziak lut ve turin ka sawm a ni,” a ti.