Central minister-in RD hnuaia hmalakna en

Sawrkar laipuia minister of state for Rural Development Kamlesh Paswan chuan Inrinni khan Mizoram rawn tlawhin Aibawk RD Block a tlawh a. A kal lamin Muallungthu khuaa PMAY-G (Housing for All) hnuaia sak MS Dawngliana in a tlawh nghal.
Aibawk block development officer Esther Leihang chuan powerpoint presentation hmangin hmalakna leh hmachhawp a sawifiah a. Central minister chuan Prime minister Narendra Modi-a’n India hmarchhak state-te tih hmasawn a tum hle a, hmasawnna rahbi pawh tuk mekin, mi hnuaihnung ber a thlen theih nan hma an la zel dawn a; a ni pawh a ministry chan hnuaia hmasawnna hnathawh dan leh eng harsatna nge an tawh tih hre turin a lo kal tih a sawi. PMAY-G hnuaiah Mizoramah mi sing thum chuangin tanpuina an dawng thei chu lawmawm a tih thu a sawi a ni.
Mizorama inkalpawhna chuan hma sawn zelin, hmun kilkhawr tlawh pawh a nih theih nan sawrkarin hma a la zel dawn a. Rel lo lut tur chuan hmasawnna tam tak a thlen dawn tih a sawi bawk.
Aibawk RD Block hnuaia heng scheme hrang hrang kalpuii – Pradhan Mantri Awaas Yojana- Gramin (PMAY-G) Pradhan Mantri Gram Sadak Yojana (PMGSY), MGNREGA, Deen Dhayal Upadhaya Grameen Kaushalaya Yojana (DDU-GKY), MzSRLM adt. viltu leh buaipuitu official-te an hmalakna zawtin, a chhawrtute hnenah pawh harsatna an neih a zawt. Khawtlang hruaitute a kawm bawk.
Minister of state hi PMGSY director KM Singh leh MLA K Hrahmo ten an tawiawm a ni.
Hemi hnu hian Kamlesh Paswan hian larsap Dr Hari Babu Kambhampati chu Raj Bhavan-ah a kawm a. Mizoram a rawn kal chhan a hrilh. Thingtlangmiten Rural Development department hnuaia program hrang hrang leh hmalakna an tangkaipui thu sawi dunin, an ngaihpawimawh thil dang an sawi bawk.
Inrinni zan hian Raj Bhavan-ah riakin Pathianni khan Delhi panin a haw leh a ni.