Central Scheme DAJ-GUA

Mahatma Gandhi pian champha October ni 2 denchhena 2024 atanga kalpui tan tawh sawrkar laipui Scheme pakhat, tribal mite hmasawnna tura duan Dharti Aaba Janjatiya Gram Utkarsh Abhiyan (DAJ-GUA) chungchang inhrilhhriatna chu tun Pathianni atang khan Saitualah neih tan a ni a.
He scheme atan hian sawrkar laipui chuan kum 5 chhung atan cheng vaibelchhia 79,156 a ruahman a. DAJ-GUA hnuaiah hian scheme 25 siam niin chu chu ministry 17 hnuaiah kalpui tur a ni.
Mizoram bikah chuan he scheme-in a tuam tur hi district 11-a thingtlang khua 383, mihring 4,14,444 a ni ang a, heng zinga 96.67% chu ST an ni. A mamawhte hnena hmasawnna a thlen ngei theihnan awareness campaign neih hi a pawimawh hle a; hei hi ngawrh taka kalpui a pawimawh dawn hle a ni.
Entir nan, tourism ministry hnuaiah chuan Swadesh Darshan hnuaiah Home Stay thar sakna tur cheng nuai 5 sawrkar laipuiin a tumsak ang a, Home Stay atana cheibawl theih emaw, a awm sa tuai thar lehna (renovation) atan cheng nuai 3 a pe dawn bawk a ni.
Chutiang bawkin Education hnuaiah hostel sakna tur te, AH&Vety hnuaia entrepreneurs tan 50% subsidy pek te, chutiang zelin ministry hrang hrang 17 hnuaiah tribal-te hmasawnna tur leh dawmkanna tur scheme hrang hrang siam a ni a, hei hi kum 5 chhung atana ruahman a nih avangin Mizoram hmasawnna atana kan chhawr thiam a pawimawh dawn hle a ni.
A tlangpuiin, Mizoram Governor lo awm tawh leh tuna awm mekte hian, Mizoram pachhiatzia an hai lo a, chutih laiin Mizoram hian sawrkar laipui scheme tha tak takte hi a nihtur angin kan chhawr tangkai tawk lo tih an hmu a, khawi kipa an kalnaah Central scheme tha tak tak a awm thu leh chungte chu bawh ve tur te, sawrkar hnathawkte pawhin mipuite kawhhmuh zau thin se an duh thu an sawi thin a ni.
Sawrkar laipui hian ram leh hnam hmasawnna tur scheme leh programme hrang hrang hi a duang reng a. Keini state pachhe tak, mihring tlemte awmna hian, a nih tur angin heng scheme-te hi bawhzui peih thin ila chuan, hmasawnna hnathawhna atan state budget hmang vak lo pawhin nasa takin kan changkanpuiin hma kan sawn phah thei a ni tih hi a chiang em em a; mahse, chu chu a la thleng dik hleithei lo chu a ni ber e.