Chak theihna sang tak kan nei – Dr R Lalthangliana

Lok Sabha inthlanah chak theihna sang tak an nei tih MNF hruaitu Dr R Lalthangliana chuan a sawi.
Thawhtannia MNF office, Mizo Hnam Run-a inkhawmah party senior vice president hian Zoram dung leh vang fangin Mizoramah an campaign chhuak vek a, an campaign tawhnaah mipuiin an thlawp em em tih sawiin, “Pathian zarah chak theihna sang tak kan nei a ni,” a ti.
MNF sawrkar chhunga an thil tih leh Health minister a nih chhunga ram leh hnam, mipui tana tangkai tur a lo tih tawhte Dr R Lalthangliana hian a sawi a. Mizoram State Cancer Insitute din a nih theih nan theihtawp a chhuah a, Japan International Corporation Agency (JICA) nen tangdunin Mizoram State Super Speciality Cancer & Research Center Zemabawka din turin an tifel tawh bawk a, cheng vaibelchhe 700 loan lakna tura inremna ziah a ni tih a sawi. Hetiang project liantham MNF sawrkar hunlaia an tihlawhtling thei chu lawmawm a tih thu a sawi a ni.
AMC corporator David Zohmangaiha pawhin MNF party hi hnam party a nih angin ram leh hnam leh sakhua vei nasat a ngai lehzual tih a sawi a. Ram leh hnam tana an hmachhawp thil tam tak tihlawhtling tura theihtawp chhuah a tul ih a sawi a ni.