Champhai district-ah raltlan 14499
Champhai district-a khaw 47-ah raltlan 14499 an awm mek a; mi 9488 hnenah temporary ID pek a ni tawh.
District Level Committee on Myanmar and Bangladesh Refugees Champhai chu a tum khatna atan an chairman, bawrhsap James Lalrinchhana hoin Ningani khan an thukhawm a. Kumin March 28-a sawrkarin a din District Level Committee on Myanmar and Bangladesh Refugees kalphung leh inkaihhruaina siamte sawifiah a nih bakah bawhzui tur rel a ni.
Chairman chuan Champhai district chu thenawm ram Myanmar buai avanga raltlan nei tam ber leh buaipui nasa ber district a ni, tiin, raltlan chungchanga hmalakna leh thuthar awm reng reng chu thawhhona tha tak hnuaia vil tlan a tul tih a sawi a ni.
Village Level Committee on Myanmar Refugees chu sawrkar thuchhuah zulzuiin Village Level Committee on Myanmar and Bangladesh Refugees tia thlak remtih a ni a; an dinhmun zirchiana tuaihnum nise, a tul angin Sub-Committee/ Working Group pawh din nise, tih a ni. A khat tawkin raltlante chhawmdawla buaipuitu agency-te nen thutkhawm thin nise an ti bawk.
Raltlante tana inkaihhruaina siam, 2023 March 31-a chhuah chu sawiho niin, hriattirna lo tih chhuah tawh chu tha taka kalpui nise, an ti a. Raltlan buaipuitu leh an tana thahnemngai taka thawktu agency hrang hrang, NGO, kohhran leh mimal tlawmngaite hmalakna fakawm an tih thu sawi a ni. Hmalakna, tanpuina leh chhawmdawlna dawnte District Level leh Village Level Committee member leh agency-te inkarah inhrilhhriat zung zung a tul thu leh lungrual taka hma lak ho a tul thu sawi a ni.
Raltlante chu hriatthiamna avanga awm an nih angin, ram dan leh dun zam ngaipawimawh tur leh dan pela che lo tura beisei an nih thu sawi a ni a. Raltlan leh khawtual mite inkarah inhriatthiamlohna a awm loh nan leh, inkaihhruaina siamte tha taka zawm a nih theih nan District Level Committee leh Village Level Committee-te tha taka thawhho tlan zel a tul tih sawi a ni bawk.
Kumin April 27 thleng khan Champhai district-ah raltlan 14499 an awm a; puitling zingah mipa 4245 leh hmeichhia 4524 awmin, naupang 5730 an awm bawk. Relief camp 23 a awm a, raltlan zinga 6346 chu relief camp-ah chengin, 8153 chu hmun dangah an cheng thung. Raltlan zawng zawng 14499 te profiling tih a ni a; mi 9488 te remporary ID pek chhuah tawh a ni.