Champhai district-in CM hoin kum 25 tlin an lawm

Champhai district-in kum 25 a tlin, Silver Jubilee chu Zirtawpni khan lawm a ni.
Jubilee lawm hmanpuitu chief minister Lalduhoma chuan Tualpui khuaa piang, Champhaia inbengbel an nih angin, Champhai chu a nu leh pa leh a u te lungnghahna, an damchhunga an theihnghilh theih tawh loh tur a ni tih a sawi a. Champhai district chu pi leh pute sulhnu hmun pawimawh tam tak neitu, khualzin hipna hmunhma ngah tak a ni, tiin, heng tourism hmunhma hi nasa taka thuamthat a ni dawn a. Mipui pawh khualzinte laka hawihhawm thiam a tha hle tih a sawi a ni.
Buh leh thlai dang tharchhuak tam district, grape wine siamna hmun pahnih awmna, sangha thar tam district a ni, tia sawiin, hmalak theihna ram pawh a la nei tha hle tih a sawi bawk.
Myanmar-a Zohnahthlak unauten harsatna an tawk a, himna zawnga rawn tla thlate lo dawngsawng hmasatu, vawiin thlenga engemawzat enkawl mektu district an ni tih chief minister hian a sawi. “Tunhma chuan heng lai bial khawtin hi Zonun zemawi tak tak a taka nunpui thintu tia sawi a ni thin a. Vawiinah enge kan an zel ka hre loa, kha’ng Zonun zemawi tak tak kha a theih chen chen vawngnung zel ila. Pipu hmunhlui leh nunhlui tha tak takte neitu nih zel tum ang u,” tiin mipui a sawm.
Chief minister hian jubilee lungphun leh jubilee puala photo galery a hawng nghal a. Thusawi leh item dang engemawzat a awm a, tlaiah jubilee ruai theh a ni.
Champhai district hi 1997 December 12-a puan a ni a, sawrkar hriattirna hi a kumleh 1998 March 11-ah chhuakin, hemi kum vek April-ah hawn a ni.