Champhaiah nursing zirna din

Mizorama General Nursing & Midwifery (GNM) zirna in pathumna – GNM School Champhai Vengsang ami chu Zirtawpni khan Health & Family Welfare minister Dr R Lalthangliana’n a hawng.
Minister chuan Mizo nurse-te hna an thawk tha in India ram chhung leh ram pawn hmun hrang hrangah an inzarpharh tih a sawi a. Sawrkarin nursing line tih hmasawn zel a ngaipawimawh a, Council of Ministers-in Directorate of Nursing din a remti a, hei hian nursing lamah hmasawnna tam tak a thlen ngei dawn tih a sawi a ni.
GNM School Champhai hi Lunglei leh Kolasib hnuah Mizorama GNM zirna school pathumna a ni a. Inspection pawh paltlang tawhin, kumin academic session tharah hian class tan nghal tum a ni. Batch khatah seat 20 awm tur niin, kum thum chhung zir tur a ni a. Class XII Arts, Science leh Commerce zir zo, 40% mark hmu chin tan dil theih a ni. Indian Nursing Council-in a bituk angin August 1 atanga September 30 chhungin admission process kalpui a ni dawn a ni. Principal turin sawrkarin F. Lalnunsiami a ruat tawh a, zirtirtu (tutor) tur 20 lakna kalpui mek niin MSSSB-in written exam a nei tawh a, result nghah mek a ni.
Mizorama Critical Care Block hmasa ber ni turin Champhai District Hospital leh ZMC ah Critical Care Block ruahman mek a ni a. Zirtawpni vek khan Health minister Dr R Lalthangliana hian a lungphum a phum. Damlo na zual – emergency, surgical & intensive care enkawl theihna Critical Care Block hi khum 50 awm tur niin, India Covid-19 Emergency Response and Health Systems Preparedness Package Phase II (ECRP-II) kaltlanga ruahman a ni. Implementing agency hi NHM Mizoram niin, civil works executing agency chu Mizoram PWD a ni. A project hnuaia building component hi Rs. 13,46,40,800 a ni a, PWD-ah transfer tawh niin, contractor thlan tawh a ni a, hnathawh bul tan mek a ni.
Critical Care Block hian Intensive Care Unit, High Dependency Unit, Isolation Room, Isolation Bed, Dialysis, Maternal & Child Health Operation Theater, Labour, Delivery & Recovery, Laboratory a kengtel dawn a ni.