Champhaiah SARAS Fair nei

Self help group-te thil siam leh thar phochhuahna leh hralhna hunpui, ‘Sale of Articles of Rural Artisans Society (SARAS) Fair 2023’ chu Thawhlehni atang khan Champhaiah neih tan a ni a, Inrinni thleng neih a ni ang.
SARAS Fair hawngtu Rural Development minister Lalruatkima chuan SARAS Fair chu SHG-te dinhmun chawikan leh an hmalakna tih hlawhtlin zelna kawnga pawimawh tak a ni, tiin, Fair neih theihna tura hun leh tha leh ngaihtuahna sengtu RD official-te leh SHG-te chungah lawmthu a sawi.
Mizoramah SHG 10708 awm mekin an hnuaiah member 84169 an awm a. Heng SHG-te hi state economy thanlen zelna leh ram intodelhna kawngah hmun pawimawh tak an luah tih Lalruatkima hian a sawi a. Mizorama SHG movement hlawhtlin chhan pakhat chu bank-te tawiawmna vang a ni tih a sawi bawk.
SARAS Fair hawnna inkhawmah hian SHG 44 hnenah bank hrang hrang atangin loan vaibelchhe 2.2 pek chhuah an ni.
SARAS Fair hi sawrkar laipui Ministry of RD chuan state tina State Rural Livelihood Mission (SRLM) te buatsaih turin a beisei a. Mizoramah kum 2015 atang khan hman tan niin, Champhai SARAS Fair 2023 hi tum 8 neihna a ni. Tun tumah hian RD Block 19 atanga SHG kalkhawmten stall 50 leh food court pathum an siam a ni.