Champion lai Senegal an tla

African Cup of Nations (Afcon) 2023 khelh mekah champion lai Senegal in semi-final an lut zo lo. Senegal hian inelna thlengtu Ivory Coast chu penalty shootout-ah an hneh lo. Thawhtan zana last 16 inkhel dangah Cape Verde Islands in hnehna an chang ve bawk.
Champion lai Senegal hian Stade Charles Konan Banny de Yamoussoukro-ah inelna thlengtu Ivory Coast an hmachhawn a, hma takah goal thun mah se an chakpui zo lo. Inkhel tan atanga minute lina lekah Sadio Mane siamsak atangin Habib Diallo chuan Senegal hmahruaina goal a thun nghal. Hma takah goal an thun vangin inelna thlengtu lakah chakin quarter-final luh beiseina sang zawk an nei a. He goal hian khelmuala mipui tam tak a tihrilhhai hle bawk.
Hma takah goal chhuah mah se Ivory Coast an insiamtha thuai a, an talbuai zui duh lo. Hun rei tak chhung an si phurh sut thei lo mah se an beidawng duh lova, goal thun tumin thapui thawh an thawh zui zel. An thawhrim rah an seng a, hun tawp dawnah hun tha an hmu ta nge nge a, penalty an hmu. He penalty hi Franck Kessié chuan an si phurh sut nan goal ah a chantir. Kessie goal thun hnu hian goal dang a luh belh thei tawh lova, 1-1 in an inhnehtawk.
Quarter-final lut zawk nih tuma tan khawhin, innawr zui viau mah se minute 30 dang an khelh zawh thlengin goal thun tei an awm lova, tie-break hmanga thelh an ngai. Penalty shoot-out-ah hian Ivory Coast tana pettu mi pangain an pet goal vek laiin Senegal tana pettu Moussa Niakhaté chuan a thelh thung a. Ivory Coast hian 5-4 a hnehna changin Senegal an hnawtchhuak a, quarter-final an lut zui ta a ni. The Elephants’ hian inrinni zan khian quarter-final-ah Mali leh Burkina Faso te inkhela chak zawk zawk an hmachhawn zui leh ang.
Thawhtan zana Afcon last 16 match dangah Cape Verde Islands chuan minute 88-naah Ryan Mendes penalty pet goal hmangin Mauritania an hneh a, quarter-final an lut ve bawk.