Champion laiin Leverkusen title lawm hun tikhawtlai hlek
Inrinni zanah Bundesliga title hnuhnung 11 hui zo vektu Bayern Munich chuan 2-1-a an mikhual Cologne hnehin Bayer Leverkusen kuta league title lut tur la dang hram hram mah se nizan result tarlan hman lohah Xabi Alonso team Leverkusen-in an mikhual Werder Bremen an hneh chuan an club chanchina a vawikhatna atan German champion an ni fel tawh ang.
Defending champion Munich hian FC Koln lakah first half chhungin goal an khung zo lo a, England captain Harry Kane leh Mathys Tel-te’n goal ban an fuh ve ve.
League game 29-a goal 32 thun tling Kane hian top scorer trophy a beisei mekna kawngah a thun belh zo tlat lo.
Second half tir lama Raphael Guerreiro goal leh hun pekbelha Thomas Muller-te goal thun hmangin an kawtkaiah point thum an thawkchhuak zui ta tho a ni.
Kha result avang khan khelh 29-a point 63 neiin, khelh nga chauh awm tawhah an aia game khata khel tlem Leverkusen lakah point 13-in an hniam a, nizan result tarlan hman loha Alonso team an chak chuan Bayern tan hmakhalh ngaihna a awm tawh dawn lo a, a vawikhatna atan Leverkusen kutah Bundesliga title a lut nge nge tawh dawn a ni.
Borussia Dortmund kuta 2011-12 title a luh ve zuai hnu atang khan German top flight inelnaah Bayern Munich hlir an champion zawn chho ngat ngat a, tun season kal laiah hian Real Madrid midfielder hlui Xavi Alonso hnuaiah ropui takin Leverkusen an inlan a, he thu i chhiar lai hi chuan an champion fel tawh hial mai thei!
October 2022-a Alonso an rawih tirh khan Leverkusen hi relegation zone-a la tang mek an ni a, tunah zet erawh treble champion ni thei turin chance sang tak an nei mek a, Bundesliga lama an dinhmun chu tarlan sek tawh ang hi niin, German Cup final-ah second-tier side Kaiserslautern an tum dawn a; karliamta Ningani khan Europa League quarter-final first leg-ah sihnih faiin West Ham United an hneh bawk.
Nizan league match-a Werder laka tlawm an pumpelh hrim hrim chuan league season kal laia tlawm la nei lo Leverkusen hian tun season-ah match 29 chhung tlawm an pumpelh tling chiah dawn a, chu chu Bundesliga record thar a ni ang.