Chanmari FC an tlawm

September 14, Inrinni khan LZ Juice MPL 11 round 10-na khelh chhunzawm a ni a, season kal mekah tlawm nei lova kaltluang Chanmari FC chu Sihphir Venghlun FC lakah an tlawm. MPL 11-ah a vawi khat nana tlawm Chanmari FC hian Aizawl FC lakah an hmahruaina a hloh fel zui nghal. Inrinni zana inkhel dangah Ramhlun Athletic FC leh SYS FC te an inhnehtawk ve thung.
Table chung berah kir leh tura chak mamawh Chanmari FC hian Sihphir Venghlun FC lakah bul an tan tha viau a, inkhel tan atanga minute hnihna lekah K Lalhmangaihkima goal thun hmangin hma an hruai nghal. Hma takah goal thun mah se I League 3 an khelh vanga chau Chanmari FC an tlo zo lova, goal li ngawt chhuahin, MPL 11-ah a vawi khat nan an tlawm.
Semi-final khel phak tura chak mamawh Sihphir Venghlun FC hian na takin an khingpuite an nawr let a, goal li ngawt an thun. SVFC tan hian Lalthanpuia chuan minute 23-naah goal thunin an si phurh a sut. An si phurh sutna goal a thun atanga minute 20 hnuah Lalthanpuia hian goal a thun nawn leh a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal pawh a lut leh thuai. Second half tan atanga minute hnihna lekah Siphir Venghlun tan goal hnih thun tawh Lalthanpuia chuan goal thun nawn lehin hattrick a siam. Chanmari FC laka hattrick siam Lalthanpuia hi Kuriz man of the match ah thlan a ni. Hun rei tak 3-1 a hma an hruai hnuin Malsawmtluanga Pautu chuan hun bek belh minute 90+3-ah an goal lina a thun zui leh a, Chanmari FC lakah 4-1 a hnehna changin point thum hlu tak an hmu.
Inrinni a inkhel dangah Ramhlun Athletic FC leh SYS FC te 1-1 in an inhnehtawk. Rawlthar team hmuhnawm Mesak C Lalrindika chuan minute 21-naah hmahruaina goal a thun. Hun rei tak hnufual zawk an nih hnuin Ramhlun Athletic FC tan Benjamin Lalnunpuia chuan minute 80-naah goal thuin an si phurh a sut a, tlawm an pumpelh zui ta a ni.
MPL 11, round 10 thleng khelh zawh takah tlawm nei lova kal tluang Aizawl FC in khelh 10 atanga point 24 hmuin table hmahruaitu an ni a, AFC hian semi-final an hnaih viau tawh. Inrinniah a vawi khat nan an tlawm vangin Chanmari FC in khelh 10 atanga point 23 hmuin Aizawl FC lakah an hmahruaina an hloh fel. Table chunga awm pahnih Aizawl FC leh Chanmari FC te hian semi-final an hnaih viau tawh. Anni pahnih bakah hian champion lai Mizoram Police FC, SYS FC, Sihphir Venghlun FC leh Ramhlun FC ten semi-final lut thei dinhmunah an la ding bawk.