Chaubey hi Indian football tichhetu a ni – Bhutia

Chaubey hi Indian football tichhetu a ni – Bhutia
India captain hlui Bhaichung Bhutia chuan tunhnai khan All India Football Federation (AIFF) president inthlana a ngam loh Kalyan Chaubey chu chhe taka puhin, tunlaia India national team tlahniam zelah Chaubey hi mawhphurtu dik tak a nih thu a sawichhuak bawl!
AFC Asian Cup qualifiers third round tunhnaia khelhah khan India chu Fifa ranking-a an aia hniam zawk Hong Kong lakah sikhat faiin an tlawm a, Thawhlehnia Hong Kong khelmuala point an hmuh zawh loh avang khan 2027 Asian Cup khel tura India beiseina a chau zual leh sauh a ni!
Hmuh theiha Indian football dinhmun hniam zelah Sikkimese Sniper Bhutia hian Chaubey leh a kaihhruai national federation chu mawhphurtu dik tak an nih thu a sawichhuak piap piap a, “Kan thil hmuh hian min tina takzet a; tun dinhmunah tak hian Asia Cup kan beiseina kawngah kan talbuai nasa hle a, regular taka kan khelh chhoh Asia Cup kan khel pha dawn em tih pawh a chiang lo leh hle tawh a ni.
Ram thenkhat – Uzbekistan leh Indonesia tih velte pawh tunlaia an khelh that zar zoin an tling der tawh a; Jordan pawh a tum khatna atan World Cup khel tur zingah an intatlut fel tawh bawk a, keini erawh Asia Cup khel lo thut thei dinhmunah kan ding er reng tawh a, a vanduaithlak ngawih ngawih a ni,” a ti.
India captain hlui lungawi lo hian mimal taka Chaubey bei zui zelin, Indian football ruhrel siamtha leh tur chuan AIFF president a ban phawt a tul thu sawi chungin khelmual chhung leh pawn lam thlenga India team tawih kal zel chu federation leh president vang liau liau a nih thu a sawi hreh lo!
Indian Super League side FC Goa coach ni tho chunga India head coach ni tel tura an sengluh Manolo Marquez chuan nikum July thla mai khan Croatian legend Igor Stimac-a kut atangin Blue Tigers enkawl hna a lachhawng a; Stimac pawh kha result chhe tak tak a neihpui avanga an petchhuah niin, Croat hoa an tlawm zingah Guwahati khaw World Cup qualifier-a Afghanistan an hneh loh kha a tel!
Tun Thawhlehni inkhel hmachhawn tur khan Kolkata khawpuiah national team hi chawlhkar thum an inkhungbet a, chuti chung chuan Fifa ranking-a 153-na team Hong Kong lakah world number 127-na luahtu India a tlawm a, an aia ranking-a pen 27 ngawta hniam laka point khat em pawh an thawkchhuak zo lo khan Indian football-in tlakhniam lam a pan zel dan a tarlang chiang thaw khat hle a ni.
Fifa ranking thar tarchhuah leh turah India hi an tlakhniam belhchhah leh dawn a, 133-na an luah dawn a ni.
Tarlan tawh thin angin, Bhaichung Bhutia hian September 2022 khan AIFF presidential election-ah Chaubey hi a hneh lo a; kha mi hnu khan federation a kaihhruai danah Chaubey a lo chaurau ve bawk nen India captainb hlui hian na tak takin AIFF president hi a bei fo a, a kawhna point tlangpui chu management lama fel tawk lo, corruption-a fihlim bawk si lo, thutlukna lian tham, entirna’n, Marquez-a rawih chungchang han tih angahte footballing committee lian lian kalkana mahni thua thil kalpui nasa tihte a ni hlawm.
Bhaichung-a chuang, “Kalyan Chaubey hian Indian football a tichhe vek a ni. Hei vang hian a in resign ngei tur a ni a, a post chelh lai atang hian a kalbo tur a ni.
“Kum hnih leh a chanve lek chhunga general secretary pathum ngawt a nei hmante hian a leadership dinhmun a tarlang chiang a, AIFF ruhrel, a system pumpui hi thlakdanglam hlawk a ngai.
“Inhnial theih tak a thleng indawt chho zut reng a, corruption charge kan hre awl lo a, thla khat aia tam a liam leh tawh chung pawhin tu ber nge I-League champion ni ta pawh kan la hre lo,” tiin champion nih inchuha dan hmanga inbei mek Inter Kashi leh Churchill Brothers chungchang buai a tarlang tel.
Bhutia hian Chaubey chu head coach atana Marquez an lakluh kawngah pawh Technical Committee kalkana a thuneihna hmang sualah a puh a, Spaniard-in FC Goa leh national team a enkawl kawp an phal ringawt pawh chu na takin a sawisel bawk.
Bhutia hian mahni duh thu ngeia international football chawlhsan fel tawh striker hlu bik Sunil Chhetri an hruaikir leh ringawt pawh a dem a, ruahmanna fel tak aia a ler atanga thuai tumah a puh tlu hmiah!
India international hlui Goutam Sarkar pawhin Bhutia thu leh hla hi a thlawp tih sawichhuak ve tawhin, national team than thu tlat mai chu federation hlawhchhamna a nih thu a sawi a, Sunil Chhetri pawh chhawr zui engang mah se hmasawnna a awm theih tak tak dawn chuan loh thu leh engkima mawhphurtu chu federation is completely ngei a nih thu a auchhuahpui ve bawk.
Legendary defender leh coach ni bawk Subrata Bhattacharya pawhin foreign coach an ruai teivet chu demin, Indian talent chunga rinna sang zawk nghah a sawimawi a, foreign coach-te atanga hlawhtlinna hmuh ngei ngei tur tih a awm loh thu leh domestic coach thenkhat PK Banerjee leh Amal Dutta tihte chuan ropuina an senglut zawk niin a sawi.
Subrata chuan, “ISL lama foreigner kan khelhtir luih luihte hian engti kawng mahin Indian player-te hmasawnna kawng a hawi lo a, Indian coach-te chauhin kan naute hi an hrechiang a, an hmasawnna turah pawh puitu awmchhun an ni,” a ti.
Bengaluru FC owner Parth Jindal pawhin social media kaltlangin AIFF chu insiamthatna lam hawi hmanhmawh turin a au ve bawk.