Adele chuan rei tawk fang rimawi khawvel atanga bikbo a tum thu a puang a, chumi hmaa a concert hnuhnung tur ticket man a pung nghal thur thur mai. Adele hian November ni 23-ah Caesars Palace, Las Vegas-a The Coloseum-ah a Las Vegas residency kharna a nei tawh dawn a, chumi hnuah chuan rimawi khawvel atangin tiam chin awm lova bikbo rih a tum.
A concert ticket hi a man pangngai chu dollar 400 a ni a, VIP pass te chu dollar 1,000 man thleng te a ni. Mahse, a chawlh tur thu a puan hnuah ticket last minute resale platform Viagogo leh Gametime-ah te chuan ticket man a pung nasa nghal hle a, a seat tha deuh te chu dollar 17,050 atanga dollar 18,766 man te a kai nghal dawrh dawrh mai a ni.
Adele hian August thla kalta khan Munich, Germany-ah thla khat chhunga show vawi 10 neiin, August ni 31 khan a Munich residency hi a khar a, a show tawp zanah fan-te hnenah chawlh a tum thu puangin, “Chawlh ka mamawh a ni. Tun kum sarih kalta chhung khan nun thar rahbi ka intuk chawp a, tunah chuan han chen ve deuh te ka duh tawh a ni. Ka nun thar buatsaih chu tem ve tawh ka duh a, mahse, ka ngai ngawt ang che u,” a ti.
Adele chuan rimawi chawlhsan deuh vang vang a tum thu hi sawiin, tunah chuan album thar buaipui tumna pawh engmah a nei lo niin a sawi bawk. Adele hian 2021 khan a album ‘30’ a tlangzarh a, Billboard 200 chart-ah No.1 kaiin, hemi hnuah album dang a la tichhuak leh ta lo.
Chawlh a tum thu a puan hnuah Adele final concert ticket man a pung nasa
Get real time updates directly on you device, subscribe now.
Next Post