Chelsea hmachhawn tur Flamengo

Thawlehni zan khan Fifa Club World Cup 2025 khelh chhunzawm niin Group C leh D a mite an inching fel a, Chelsea in last 16 an lut. Inelna neih meka last 16 lut hmasa ber Bayern Munich chu Benfica hneh lovin an tlawm a, group champion an ni zo lo.
Group D-ah last 16 luh inchuhna inkhel pawimawh takah English club lian Chelsea leh Esperance Sportive de Tunis te an inhmachhawn. Inkhel pawimawh takah hian London club lian Chelsea in 3-0 ngawtin hnehna an chang a, last 16 an inhlangkai.
Lincoln Financial Field, Philadelphia a inkhelah beisei angin Chelsea in goal an thun hma thei bik lo. Goal thun thei lawk lo mah se Chelsea hian chawlhlawk dawn hnaih hun pek belhah goal hnih ngawt an thun thung. Tosin Adarabioyo chuan minute 45’+3-ah hmahruaina goal a thun. Hmahruaina goal an thun vangin an phur thar hlaui a, goal pawh an thun belh leh thuai. Hmahruaina goal an thun atanga minute hnih hnu lekah an forward thar Liam Delap chuan an goal hnihna a thun zui leh zat a, si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tumin an innawr tawn nasa hle viau. Chawlhlawk hma ang bawkin goal lut a awm thei lo leh reng a, hun pek belhah Chelsea bawk an che fuh leh. Hun pek belh tawp dawn tep minute 90’+7-ah Chelsea tan Tyrique George chuan an goal thumna a thun leh ta mai a, an chakna a nem nghet. Tyrique George goal thun hnuin goal dang a luh belh thei tawh lova, inkhel pawimawh takah Chelsea in 3-0 ngawtin hnehna an chang ta a ni.
Group D-a inkhel dangah point ruk hmua last 16 lut chiang tawh Flamengo leh dinhmun chhe taka ding Los Angeles FC te an inkhel a, 1-1 in an inhnehtawk. Chak chunga group match khar tum LAFC in minute 84-naah Denis Bouanga goal thun hmangin hma an hruai. Hun tawp dawn tepah goal an thun vangin an chak zui mai a rinawm hman viau. Goal an thun vangin phur viau mah se Flamengo hi an phur rei lo viau thung. Goal an thun atanga minute hnih hnu lekah goal an chhuah zui leh nghal zat a, Flamengo tan Wallace Yan chuan goal thunin an si phurh a sut a, 1-1 in an inhnehtawk zui ta a ni.
Group D-ah hian tlawm nei lovin Flamengo an tlang a, khelh thum atanga point 7 hmuin Brazil club lian hi group champion an ni. English club lian Chelsea in point ruk hmuin last 16 an lut a. Esperance Sportive de Tunis leh LAFC te last 16 lut zo lovin an tla ve thung.
Bayern an tlawm
Thawhleh zana inkhel dangah last 16 lut hmasa ber Bayern Munich chu Benfica hneh lovin an tlawm ringawt a, group champion an nih zawh loh phah. Benfica leh Bayern Munich te hi point 6 hmu ve ve chungin an inhmachhawn a, group champion nih an inchuh. Group champion nih inchuhna inkhel pawimawh takah Benfica tan Andreas Schjelderup chuan minute 13-na lekah hmahruaina goal a thun. Hma taka an goal thun hnu team lian lakah hun tawp thlengin an venghim a, hnehna pawimawh changin point thum hlu tak an hmu.
Bayern Munich laka an chak vangin Benfica hi Group C champion an ni a, last 16 ah Chelsea an hmachhawn zui thei dawn. Benfica tan Chelsea hmachhawn hi thil chakawm tak a ni dawn lova, last 16-ah fiahna hautak tak an hmachhawn a ngai dawn. Bayern Munich pawh hneh thei an nih vangin Benfica tan Chelsea hi huphurhawm lutuk an ni dawn lo thung. Group champion ni lo pawh ni se Brazil club lian Flamengo an hmachhawn zui tho a ngai dawn. Inelna neih mekah Brazil club te an chetthat tlan em vangin Brazil club te hi hmachhawn chakawm an ni hauh lo.
Befica lakah an tlawm vangin Bayern Munich hian Brazil club lian Flamengo an hmachhawn zui leh a ngai dawn. Fifa Club World Cup khelh mekah Brazil club te an chetha tlang em em a, tutan pawh hmachhawn huphurhawm an ni. Bayern Munich leh Flamengo te inhmachhawn tur hi inkhel hmuhnawm tak a nih ngei a rinawm. German champion hian Flamengto hmachhawn lo pawh nise English club lian Chelsea an hmachhawn a ngai dawn tho va, an tan duh thlan tur a vang ve hran pe hrim hrim bawk.
Group C a inkhel dangah Argentina club lian Boca Junior chu khelh hnih atanga goal 16 zet chhuah tawh Aucland City lakah an chak zo lo ringawt a, 1-1 in an inhnehtawk. Boca Junior hian minute 26-naa Nathan Garrow own-goal hmangin hmahruai bawk mah se professional club pawh ni phak lo Auckland City tan Christian Gray chuan minute 52-naah goal thunin an si phurh a sut. Point khat hmuin inelna an thlahliam theih phah a ni.