Chhiah lak tihsan…

Mizoram sawrkarin petrol leh diesel-a chhiah lak a tih san leh cess a lak thar tur pahnih chu mirethei zawkte leh kuthnathawktute tawrhna tur a ni tiin, tunhnai khan Congress |halaite chuan chhiah tihsan duhlohna lan tir nan ‘chhiah tihsan hriattirna lehkha’ an hal a. Lirthei neitu maiin an tuar dawn lo a, mi harsa, lirthei nei loten an tuar dawn… maxi cab, taxi, bus chuan man thlengin a nghawng dawn… tiin an sawi a.
Chhiah lak tihsan chungchangah hian taxation minister chuan chhiah lak a tihsan chu mipui tana tangkaia hman leh tur a ni tiin, sum mamawhna a san chhoh zel avangin tisang lo thei lo dinhmunah an ding tih chu mipui leh lirtheia eizawngten hrethiam a, harsatna siamsak lo turin a ngen a.
Minister-in a sawi dan chuan, petrol leh diesel atanga cess lak hi Mizoram tan thil thar ni mah se, state dang chuan hming chi hrang hrang hmangin an lo la reng tawh a. Mizoramah chuan a vawikhatna a ni tiin, VAT Rules pawh tihdanglam a ni, tiin a sawi a.
Chhiah lak tihsan hi sawrkar kaltate pawh khan an hreh thin hle a, hei hi mipui lamin an hriatthiam loh an hlauh thin vang te, election campaign te pawh nghawng thin nia an ngaih vangte pawh a ni thin awm e. Mipui lamin chhiah tihsan an hriatthiam loh chhan nia ngaih theih thil pakhat a awm a, chu chu- eiruk leh mai mai tura ngaihna a awm vang a ni a tih theih awm e. A chhan chu, eirukna a hluar miau a!
Eng pawh ni se, chhiah tihsan a nih dawn hian sawrkar lam pawhin kil hrang hrang an thlir kual ang a, a nghawng dan tur pawh hre sa vekin, kan thatpui dan tur ber nia an ngaih angin a tawpah an kal a tih theih awm e. Road infrastructure cess hi Road Fund Act 2007 nen kalkawpa lak niin, kawng siamthatna atana hman tur a ni a. Kawng siam a nihin litre khata cheng hnih kan pek hre ranin mipui lam pawhin thikthu tichhe thiam ila, chhiah lak tihsan hi hma kan sawnpui viau maithei a ni.