Chhuah phal loh player 14 zingah Chhetri tel!

Chhuah phal loh player 14 zingah Chhetri tel!
Indian men’s football team-in October thla hian Asian Cup qualifying round match pawimawh pahnihah Singapore an hmachhawn dawn a, he mi atana squad khawrpum mek head coach Khalid Jamil chuan la thlitfim leh atan player 30 lai India team inbuatsaihna camp zawm turin a thlangchhuak a, chu’ng zinga 14 zet chu Indian Super League club pathumin la chhuahtir duh loin national camp an zawm hun tur an tikhawtlai mek a, an zingah hian Sunil Chhetri pawh a tel ve!
Jamil chuan Ningani khan thuchhuah siamin, national team-a harsatna an tawh mek sutkian dan ngaihtuah turin ISL club pathumte bakah All India Football Federation a nawr a, club leh national tana inbuktawk zawnga player-te an kal theih dan sawiho a rawt.
Tarlan tawh angin, India hian October ni 9 khian chak mamawhna inkhel pakhatah Singapore luhkhungin, October ni 13 Asian Cup qualifying round match-ah bawk Singapore hi an mikhual ve thung dawn a ni.
Tun dinhmunah Bengaluru FC captain Sunil Chhetri chu club lamin an la chhuahtir duh loh langsar ber niin, player pakhat chu dam lohna avanga national camp zawm lo a ni.
Tunhnaiah Brandon Fernandes, Asheer Akhtar leh Farukh Choudhary-te’n September ni 20 atanga Bengaluru khawpuia inkulh tan Jamil-a team an zawm thar a, ti hian, tuna India camp-a player awm zat chu 18 an tling ve ta hram a ni!
Tun dinhmunah hian defender pahnih Hmingthanmawia Ralte leh Asheer Akhtar-te chauhin camp an la zawm avangin India international hlui Jamil chuan player a ngah tawk loh avangin team training pawh a buai vek tih a sawilang tel a, a bik takin tlarhnung lam luah tur player indaihlohna a nasa zual niin a sawi.
Thla hmasa maia head coach hna chelh that Jamil chuan, “Kan inbuatsaihna hi team-a innghat hawi zawnga kalpui kan ni a, mimal tu emaw thiamna leh theih falnaa innghat kan nih loh avangin position tina player kan indaih zan loh chuan inbuatsaihnain awmzia a nei thuk thei lo,” a ti.
Bengaluru FC baka an player-te national camp zawm tura la chhuah kim duh lo dang pahnihte chu East Bengal leh Punjab FC niin, tunthla tawp lam a ni tawh a, thla thar hmain player 14-te hian camp an zawm hman erawh a beiseiawm.
Kum 48-a upa Jamil chuan a probable squad-ah hian Mohun Bagan SG leh FC Goa player-te a ko tel ve lo a, a chhan pawh AFC Champions League Two campaign lama tihtur nei an la nih vang a ni.
Mohun Bagan SG hian September ni 30, karleh Thawhlehni khian Iranian club Sepahan SC an su dawn a; October ni 1-ah FC Goa-in Tajikistan club FC Istiklol an hmachhawn ve bawk ang.
NorthEast United leh Jamshedpur FC boss hlui Jamil hian mittlung thawkhat takin national team-a a hna hmasaber chu tunthlatir lam khan a hlenchhuak phawt tawh a, India head coach a nih hnua a tournament hmachhawn hmasakber Tajikistan rama CAFA Nations Cup-ah a team thar chu pathumna a nihpui.
Kha tournament-a an chechhe tlawk tlawk lo kha Blue Tigers tan an kal lehzelna turah inrintawkna petu a nih ngei beisei ila; tunah chuan 2027 AFC Asian Cup Final Round Qualifiers Group C fixture pawimawh tak tak pahnih (double-header)-a Singapore an hmachhawn tur lamah an insawrbing leh mek a, mahse, club lamin player 10 chuang an la hrenbeh mek avangin Aizawl FC coach hlui tan inbuatsaihna kalpui a hahthlak rih!
2027 AFC Asian Cup khelh tuma qualifiers an khelh tawh match hnih atangin India hian point khat an nei ve tawh a, chu chu thenawm Bangladesh nen goal awm loa an inhnehtawk atanga an hmuh niin, Hong Kong lakah sikhat faiin an tlawm tawh thung.
Group tina point hmu sang berte chauhin 2027 AFC Asian Cup hi an khelh phak dawn avangin India tan point li hum chunga an group hmahruaitu ni mek Singapore laka point an hloh then hi a rem lo hle tawh dawn a ni!

National Camp-a player 18 awm mekte

Goalkeepers: Amrinder Singh, Gurmeet Singh, Gurpreet Singh Sandhu.

Defenders: Hmingthanmawia Ralte, Asheer Akhtar.

Midfielders: Brandon Fernandes, Danish Farooq Bhat, Jithin MS, Macarton Louis Nickson, Mohammed Aimen, Vibin Mohanan.

Forwards: Farukh Choudhary, Irfan Yadwad, Lallianzuala Chhangte, Manvir Singh (jr), Mohammed Sanan K, Parthib Gogoi, Vikram Partap Singh.