CHHÛNGKAW DIN DAN SIAM THAT KAN NGAI

Rev. Dr. Zaichhâwna Hlâwndo
Kar hmasa lama kan sawi tawh ang khan Zoram Thar Column-ah Zofate nunphung siam that chungchâng kan ziak dawn a. A hmasa berah chuan chhûngkua (family) din dan siam that a ngaihna chhante kan sawi ang. Engtiang chiahin nge Zofate chhungkua tam tak a keh chhiat a, engvanga keh chhia nge a nih tih leh engtia siam that tur nge tihte kan ziak dawn a ni.
Tuna kan dinhmun dik tak han thlir hian Zofate chhungkaw awm dan hi a tha lo a ni tih chu kan hre tlangpui awm e. Chhungkaw keh chhia, pa ber emaw nu ber ruihtheih thilin a tih buai kan tam êm êm a. A bik takin kum naupang te tea pasal sun kan tam hle. Nupa inthen kan tam a, India ramah pawh a tam ber kan ni hial. Hengte avang hian fahrah enkawltu nei mumal lote kan tam hle a ni. Chu mai bakah nu leh pa nei, mahse chhungkaw khawsaho hlei thei lote pawh kan tam hle niin a lang. Hengte hi eng vanga lo awm nge tih hi kan zir chian a hun hle a ni. Zofate chhungkaw kehchhiatna chhan hi tam tak a awm thei ang a, ka hriat loh pawh tam tak a awm ngei ang. Ka lo thlir ve dante chu hengte hi an ni.
A hmasa berah chuan chhungkaw din tura kan bul tan dan a fuh tawk lo. Kan pi leh puten khuanu samsuih an lo tih thin anga innei kan tlem. Pathianin a zawm ni lo, mihring duh dana nupaa in siam kan tam a, a tlo lo. A pahnihnaah chuan nupui pasal inzawn danah kan pi leh pute kha an fimkhur angin kan fimkhur tawk lo. A pathumnaah chuan mipa ten nupui fanau chawm thei lova nupui nei kan tam lutuk. Pa berin chhungkua a chawm emaw enkawl zawh loh chuan chhungkua a buai lo thei lo. A palina ah chuan chi thlah tlâk, pa ni tlâk, fanau enkawl tura entawn tlâk lovin nupui nei kan tam. Fa hring ve ringawt, fate enkawl mawhphurhnaa lak tum mang lo kan tam niin a lang. A pangânaah chuan hmeichhiaten pasal zawn kan duhtui lova, chi thlah tlak lo tur lakah fa pai kan tam. A paruknaah chuan hmeichhia nu dinhmun pawimawhna hre mang lova pasal nei kan tam. Pasarihnaah chuan fanau rochante hi Pathian min pêk, Pathianin duh taka ama tana a siam an ni a, a duh dana enkawl tur an ni tih ka hre tâwk lo.
Engtin nge chhungkaw din dan tha lote hi kan siam that tak ang? A hmasa berah chuan nupui pasal inzawn dan kan uluk ang. Kan pasal emaw nupui tur chu Pathian remruat an nih leh nih loh ngun taka ngaihtuah hmasak tur a ni. Kan fate nupui pasal neih turah hian nu leh paten mawh kan phur tih hriat a ngai. Kan fate nupui pasal an dap dan kan ngaihtuahpui emaw hriatpui loh chuan hum sual an dai thin. An nupui emaw pasal tur pawh ni lo lakah an lo chesual a, pawi lian tak a thleng thin. Nupaah an han insiam dawn a, a nghet tak tak thei thin lo. Chuvang chuan kan faten ngaihzawng an neih leh neih loh kan hriatpui ang. An ngaihzawngte nen an awm dan te kan hriatpui vek ang. Pathian remruat tur an nih leh nih lohte tawngtai chunga venpui an ngai. Tin, kan fapa emaw fanute kawppui tur dappui emaw zawnpui deuh ngai an awm tih hriat tur a ni. Kan pi leh pute hun atang tawha chu chu kan hnam zia, kan lo kalpui tawh thin dan a ni. Hei hi Bible nena han zir pawhin a lo inrem hle a ni. Nupui pasal inneihna chang hre lo tam tak kan awmna chhan pawh nu leh paten kan fate nupui pasal tur kan ngaihtuahpui tawk loh vang pawh niin a lang.
A Pahnihnaah chuan chhungkaw keh chhe tur venna dan leh dun mumal kan siam a ngai. Zofaten nupui pasal inneih dan kan neihah hian inthen theihna dan kan nei a. Chu chuan chhan tha tak a neih a ngai lova, engvang pawhin engtik lai pawhin nupa a insiam tawhte inthen theihna dan kan nei. Chutih rual chuan duh duha inthen theih lohna dan erawh kan nei lo. Hemi avang hian chhungkaw kehchhia kan tam phah a ni. Chuvang chuan chhungkaw kehchhiatna laka invenna turin inthen phal lohna emaw duh duh a inthen theih lohna dan mumal tak kan siam a ngai.
A pathumnaah chuan hmeichhe man kan siam that a ngai. Zofaten nupa kan insiamna atan man leh mual kan siam a. Kan pi leh pute lo tih dan zui ve deuh siin lem chang ang vel lekin kan kalpui a. Hmeichhe man cheng 400 vel kan inpe a, mipa puitling nikhat hlawh pawh tling lo a ni. Hei hian kan inneihna kan ngaihhlut tawk lohzia a ti lang a tih theih ang. Mipa nupui nei tur tan engto tham a tling lo. Man eitute sem tur tham pawh a awm lo. Man eitute chu man chawitute angin kan kalpui tih mai tur a ni. Man kan la siam zel a, pipute dan kan chhawm nung zel dawn a nih chuan hmeichhe man chu man eitute sem tham, cheng 80,000- 1,00,000 tal tih a ngai. Chu chuan nupa inneihna kan ngaihlutzia a ti lang ang a, nupa inthen mai mai pawh a ti tlem ang.
A tawp berah chuan dam chhung atana inneihna thuthlung- Pathian leh mihring hmaa kan siam leh intiamna bawhchhiat pawizia kan hriat a ngai. Nupa inkara buaina a lo awm hunah thihna chauh lo chuan inthen tawh lo tura thutiam kan ni tih kha hriat a tul. Hei hi a inneite chauh ni lovin nu leh pa, chhungte, inneihna hriatpuitute leh pawmpuitute zawng zawng pawh kan tel tih hriat a, nupa leh chhungkuaa insiam tawhte ti kehchhetu ni lo tura kan fim khur a ngai.
Pathianin duh takin mipa leh hmeichhiaah min siam a. Chhungkuaa awm a, inthlah pung zel tura duan kan ni. Chhungkua ti pumkhattu, ti nghettu,tinuamtu leh din thatu nih i tum tlat zel ang u.