Chi bil hmalakna a awm lohnan hma la tura CYMA ngenna sawiho dawn

Chi bil hmalakna a awm lohnan hma
la tura CYMA ngenna sawiho dawn
Zohnahthlak chi peng hrang hrang Mizorama cheng zingah chi bil hmalakna a awm tawh lohnan Central YMA in hma la rawh se, tih chu Kumin YMA Inkhawmpui Liana relho tur zingah a tel.
Nilaini khan YMA rorelna sang ber dawttu YMA Central Coordination Committee (CCC) vawi 103-na chu Central YMA president Lalhmachhuana kaihhruaia neih a ni a. Kumin October 21-23 chhunga YMA Inkhawmpui Lian neih tura agenda lut hrang hrang thlitfim a ni.
Agenda atan tlang, ‘YMA khawih’ zingah – chi bil hmalakna awm tawh lohna tura hma la tura rawtna hi a tel a. Mizoram chhunga hnamdang sumdawng, phalna nei lo tam ta lutuk titlem turin YMA-in hma la rawh se; Mizo hmeichhiaten hnamdang pasala an neih zel lohnan Central YMA-in inzirtirna nasa zawkin kalpui rawh se; Mizo infiamna chawisan a nih theihnan CYMA-in hma la rawh se; tih leh, YMA inkaihhruaina leh nihphung leh hruaitute mawhphurhna rampumah inzirtir, tih a tel.
Sawrkar khawih zingah – inner line permit chu tun aia khauh leh awmze nei zawka kalpui a nih theihnan YMA-in sawrkarah thlen rawh se; tui hnar humhalh dan – The Mizoram Water Source Catchment Area Protection Act & Rules siam ni rawh se; Mizorama inkalpawhna kawngpui hrang hrang a chhiat avanga mipuiin harsatna kan tawk nasa lutuk thin chu a lo ziaawm theihnan Mizoram sawrkarin tun aia chak zawkin hma la rawh se, tih chu rel tur zingah a tel bawk.
Kumpuan rawtna atan pahnih – ruihhlo do leh ram leh hnam humhalh tih chu buk a ni dawn a. Central YMA budget (2025- 2026) ruahman pawh Inkhawmpuia pharh tura pawm a ni.
CCC thutkhawmah hian Tuisual Group atangin Sakawrdaia YMA Inkhawmpui Lian neih tur inbuatsaih dan report a ni a. Forest Conservation (Amendment) Act 2023 chungchanga YMA dinna inhrilhfiah a ni. YMA branch hrang hrangin an huamchhunga member leh chhungkua chhinchhiahna, village profile inhrilhfiah a ni bawk.