China-a chemical plant puakah mi panga thi

China-a chemical plant puakah mi panga thi
China khawchhak lama damdawi bawlhlo (chemical) sawngbawlna hmun puakah mi panga vel an thi a, mi 19-in hliam an tuar bawk niin sorkar chanchinbuin a puang.
Weifang khawpui, Shandong province-a Shandong Youdao Chemical-a Thawhlehni tuka thil puakah hian mi paruk chin hriat lohvin an awm bawk niin Chinese state broadcaster CCTV leh sorkar enkawl Xinhua agency chuan a tar lang.
Plant hi industrial park chhunga awm niin rannung thahna leh damdawi a hman tur chemical thil siamna hmun a ni.
Chinese social media-a video darhah chuan meikhu serthlum rawng leh dum chhah tak van lamah a invawrh sang hle.
A bul vel ina tukverhte chu a uai hnenghnuang hlawm tih a lang.
Thuneituten buaipui vatin an thelh mit a, a buaipui tur hian mi 230 chuang tirh an ni tih CCTV chuan a tar lang.
Sorkar tihchhuah, The Beijing News-in drone-a lak video a tihchhuahah chuan meikhu hi chemical plant bakah a bula hmun pakhat atangin a chhuak tih a lang.
Hmun kawhhmuhtu, Baidu Maps app atanga a lan dan chuan Youdao-a plant bulah hian textile company, machinery company leh thil siamna dang a awm.
Weifang Ecological Environment Bureau chuan thawktute endik turin a tir nghal a, a result la tichhuak lo mah se a bul hnaia chengte chu an hmai tuam rih turin an ti niin The Beijing News chuan a tar lang.
Shandong Youdao Chemical hi August, 2019-a Gaomi Renhe chemical park, Weifang-a din niin an website-ah an tar lang a. Hectare-a zau niin thawktu 300 chuang an awm.
China-ah hian chemical plant puak hi a awm zauh zauh va, nikum khan hmarthlanga Ningxia leh kum 2023 khan chhimchhaka Jiangxi-ah a lo puak tawh.
Kum 2015 khan lawngchawlhna khawpui, Tianjin-a kudama dah chemical kang duh tak leh mihring tana hlauhawm tak vawi hnih puakah mi 170 thiin mi 700-in hliam an tuar a. He thil thleng vang hian sorkarin chemical dah that dan thar a siam phah.
Kum 2015 vek khan Shandong-a chemical plant puakah mi 13 an thi bawk.