China-a lei minah bo zawng zel, pakhat thi hmu tawh

China-a lei minah bo zawng zel, pakhat thi hmu tawh
China chhim lama lei min avanga mi thahnem tak chin hriat lohva awm chu zawn hna thawh mek zel a la ni a, mi pakhat thi hriat chian a ni tawh tih Chinese sorkar chanchinbu chuan a tar lang.
Ruah nasa taka a sur hnuah lei hi Jingping khua, Yibin, Sichuan province-ah Pathianni tuk khan a min a ni.
Mi 28-te chin hriat a la ni lo va, in 10 a chhilh niin sorkar chanchibu, CCTV chuan a tar lang.
Armed police, kang thelhtu leh damdawi thiam rual mi 1,000 dawnin Pathianni khan chhanchhuah leh chhawmdawl hna an la thawk a. President Xi Jinping-a chuan a tih theih ang apiang tia mi a tlem thei ang ber thi an awmna tura thawk turin a ti a ni.
Officer-te chuan in chim awmna thin hmun vel chu drone leh life-detection radar hmanga dapin dam an la awm em tih an zawng a, tual chhung mi, a ram hmelhmang hriaten an pui bawk tih CCTV chuan a tar lang.
Hliam tuar mi pahnih chhanchhuakin mi 360 chuang hmun himah sawn chhuah an ni tih CCTV chuan a tar lang bawk.
Pathiannia thuthar lakhawmtute an kawmnaah thuneitute chuan lei min hi ruah sur nasa lutuk leh a leilung awm danin a zir loh vanga thleng nia an hriat rih thu an sawi.
Chinese Vice Premier Liu Guozhong chuan Pathianni khan chhanchhuah hna thawhna hmun hi tlawhin mi chengte pawh a kawm a. Thuneitute chu ngawrh taka mi bote zawng turin a chah tih news agency Xinhua chuan a tar lang.
Liu-a hian a bul vela ram awih deuhte chu hlauhawm a la ni thei tih sawiin chhiatna dang a thlen tawh lohna tura a himna tura beihpui thlak leh inven nan enchian a nih tur thu a sawi bawk niin Xinhua hian a tar lang.
China hian chhanchhuah hna thawh nan leh intun din lehna turin yuan maktaduai 80 a pe chhuak.
Ruah leh in sak dan fel tawk lo avanga lei min hi China-ah hian a tam hle a. Nikum khan China chhimthlanga Yunnan province-a tlangram kilkhawr lei min nasa takah mi thahnem tak an lo thi tawh bawk.