China-in United States sawisel nghal

China chuan US chu Inrinni kaltaa Taiwan inthlana chakna chang zawkte lawmpuina a thawn avangin ‘signal tha lo tak’ a pe tiin a sawi a.
US Secretary of State Antony Blinken chuan Taiwanese president-elect William Lai chu inthlan result chhuah hnuah lawmpuina thu a thawn a ni.
Beijing chuan hei hi duh lo hle in Washignton chuan Taiwan nena official a inzawmna a nei tur a ni lo tih chu a bawhchhia tiin a sawi a.
Lai hian Taiwan chu China inlulinna lakah humhim a intiam ve thung a. Mahse, Beijing chuan Taiwan chu an ram bung khat anga a ngaih tlat niin chumi kalh zawnga sawi nei a piang chu a dodal nghal \hin.
Inthlan result chhuah hnuah Taiwan leader thar lawmpuina khawvel hmun tin a\angin pek a ni a. Blinken pawhin Taipei leh Washington inlaichinna chu democratic values a innghat tlat a ni a ti bawk a.
“Dr Lai leh Taiwan leader te nen kan interest leh values in\awm te kalpui zel turin kan thawkho dawn a ni,” tiin Blinken chuan thuchhuah a siamah a sawi a.
Blinken chuan ‘cross-strait ah remna leh muanna’ a awm theih nan US chuan theihtawp a chhuah zel dawn a ti bawk a. Taiwan nena unofficial a inzawmna hun rei tak an neih tawh chu kalpui zel tur a nih thu leh US One China policy nen pawha inkawkalh a ni lo a ti bawk a.
One China policy hnuaiah US chuan China nen official-a inzawmna neiin Taiwan nen an nei lo thung. China chuan Taiwan hi a ram bung inla hrang mek anga a ngaih leh nikhat chu mainland China nena la inzawm leh turah a ngai thung.
Blinken thusawi hi Beijing chuan na taka chhang let nghalin Taiwan president leh an party independent sovereign rama Taiwan hruai luh tum nia a puhte thlawpah a ngai a ni.
Thuchhuah siamah China foreign ministry chuan Blinken an lawmpuina a thawn chuan US in Taiwan nena ‘cultural, commercial lama inzawmna chauh a nei ang’ tih chu a kalh tiin a sawi zui nghal a ni.
“China chuan US-in Taiwan nena official a inbiakna a neih a duh lo va, Taiwan affair-ah engti kawng mahin inrawlhna a nei tur a ni lo,” tiin a sawi.
Beijing thuchhuah hi Washington in US official te unofficial delegation Taiwan-ah Lai thlan tlin a nih hnua a tirh luh nghal chhanletna anga ngaih a ni bawk.
Khawthlang ram Taiwan president Lai lawmpuina thawntu zingah UK, France leh germany leader te pawh an tel bawk a.
Beijing Communist sorkar chuan Lai pro-sovereignty Democratic Prgressive Party (DPP) kum riat sorkar-na chang tawh thlan tlin a ni leh chu a duh lo hle thung a ni.
Beijing chuan DPP te chu ‘gang of seperatist’ tia sawiin Taiwan chu independent sovereign nation a leh tumtute a ti a ni.