China leh Myanmar-ah Mizoram bungrua tur la tang

Myanmar buaiin kawng hrang hrangin Mizoram a nghawng a, Mizoram sumdawngte pawh a nghawng; nikum kum tawp lam atangin China leh Myanmar-ah Mizoram bungrua tur a tang a, Krismas bazar-ah pawh khan sumdawng engemaw zat chuan zawrh tur an neih mumal loh phah tawh.
Kum a thar a, mahse Mizoram bungrua tur engemaw zat chu Myanmar buai vangin China leh Myanmar-ah a la tang. Bungraw tang hi a thahnem hle tih thu dawn a ni.
Mizoram sumdawngte hian China an dawr a, China ram khawpui pakhat Guangzhou hi Mizoram sumdawngte’n bungrua an lakna hmun pawimawh a tling. Thawmhnaw phei chu Guangzhou-a an lak a tam a, sumdawng thenkhat chuan Mizorama thawmhnaw zawrh 50% chuang hi China kutchhuak a nih an ring. Thawmhnaw bakah naupang inkhualtelemna thil (toy) te, mutbu te, thei te, thil dangte pawh China atanga lak hi a tam.
China atanga bungrua an lak hi Myanmar kaltlangin Mizoramah an phur lut thin a, thlawhnaa phurh man a to avangin Myanmar kaltlanga motor-a phurh hi a tihchi zawk. A tlawm zawk bakah boruak pangngaiah chuan nghah rei vak a ngai lo. Mahse Myanmar an buai avangin tun hnaiah a kawng a tluang lo hle.
Thu dawn danin, China ram khawpui pakhat Ruili, Myanmar dep khuaah bungrua engemaw zat a tang a, Myanmar ram chhungah engemaw zat a tang bawk.
Ruili atang hian Myanmar an luhpui a, chuta tang chuan motor-in Mizoram an panpui leh thin. Mahse Myanmar an buai nasat avangin Myanmar luhpui hman loh, Ruili-ah hian a tang a, Myanmar luhpui hman, kawng laka tang engemaw zat a awm bawk tih thu dawn a ni.
Myanmar-ah hian Mizoram luhpui tur bungraw dahna tur kudam engemaw zat a awm a, chung kudam-ah chuan bungraw tang a tam tih thu dawn a ni. Kawng laka tang pawh a tam a, kawng sira dinpui a tam tih thu dawn a ni bawk.
Myanmar buaiin Mizoram sumdawnna a nghawng dan enna remchang tak an sawi pakhat chu, apple man a to em tih hi a ni. Myanmar an buai deuh chuan China apple a vang a, a man a pung thin bawk. Tunlai hian China apple hi kg-ah Rs 500 te’n an zuar a, a hma chuan Rs 200 te, Rs 250 man te a ni thin.a ti lo a, Zofate inpumkhatna a nghawng ang tih a hlau a ni,” a ti bawk.