Civil service exam-a thil fel lo awm nia hriatah MPSC chairman ban phut

Mizoram Public Service Commission hnuaia civil service combined examination hna lak tumaah thil fel lo a awm nia an hriat avangin Commission chairman chu bang turin an phut tih Mizo Zirlai Pawl chuan an sawi.MZP Gen. Hqrs. chuan MPSC civil service combined exam hnalak hnuhnung berah thil fel lo tam tak a awm ngeiin an hria tih sawiin, exam paper thenkhatah correcting fluid hman a ni a, mark pek tawh sa thaichhiatna leh mark tihdanglamna hnuhma thahnem tak awmin an hria tih a sawi. MPSC hnuaiah hetiang sulhnu mak tak tak a awm chu pawi an tiin, hetiang thil diklo thleng hi MPSC chairman thiam loh liau liau a nih avangin, MPSC zahawmna humhim a nih zel theih nan leh thalai hna zawng mekten MPSC-ah rinna an nghah zel theih nan MPSC chairman chu bang nghal turin an ngen tih a sawi a ni.
Mizoramin remna a neih champha ‘Remna Ni’ June 30 chu kuminah pawh MZP huaihawta hman leh nise an ti bawk a. Remna Ni hi Pathianni a nih avangin June 28 (Zirtawpni) a hman turin an ti a ni.