CLIMATE SMART, SUSTAINABLE FARMING – 17

RK Dawla
Mb 9366095658

1. April thla tâwp ber chawlhkar a ni a. Monsoon kan beisei tan a. Thli leh ruah, rial leh têk kan hmachhawn chho leh dawn a. Leilung khawro leh thlai tuihâl pawh a rawn zia-awm chho dawn hnai a. Hetih mêk lai hian, envinronment kan tihchhiat nasat vanga harsatna chi hrang hrang – leimin, tuihâwk kawng bo, thlai natna leh eichhetu rannung puang pawh he Monsoon hian a rawn keng tel leh dawn a ni. Farming pawh, kum lokal lehzel turah hian a harsa chho telh telh dawn a, challenge hrang hrang hmachhawn chho tura kan intuai hriam a tul chho hle.
2. Ruihhlo tawlh vanga hausate zingah, mualpho an awm tan lai takin, Mizo thalai tân idol tur, mi takzet chanchinin min chiah hlauh mai a, kan vannei hle. Pu Lawmzuala of |uahzawl, India sipai chhuanvawr chanchin hian farmer-te pawh kan line-ah min bêng harh se a duhawm hle. Thla 3 a nihin a nu-in a tlanbosan a. A pite hnenah awmin kum 3 a tlinin a pa-in nupui dang neiin a awmpui leh a. A pa leh nuhrawn hi zu ngawlvei an ni lehzel a. Middle School a kal laiin, a retheih luat vangin uniform ha kim lo vanga hrem nasat ber a ni. Hei ringawt pawh hi mi tam tak chuan, beidawn a, kawng dik lo zawh na tham a ni! Tichuan, Aizawlah a tleirawl tantirha rawn insawn chhovin, hringnun kawng bumboh tak a rawn chhiar chho zel a. Huan thlai enkawlin mi pangngai thawh piah lam thawkin a rim a, a hlawhtling viau hman. 2009-ah Indian Army zawmin, harsatna tam tak karah a rawn survive a, a sustain chauh ni lovin sipai tha chungchuang niin a rawn excellent chho ta zel a nih hi. A background ngaihtuah chuan, hetiang taka mi ropui ni tur hian a kalkawng hi a raw-va mah mah chu a ni. Harsatna hian mi tumruhte chu a chher puitling zawk tih a tilang chiang ta hle. Amah hrim hrim hi, a chetdan leh tawngkam atang hian, lehkhathiam leh hawizau a ni tih a hriat a, thla 2 chhung leka Kashmiri tawng zir thiam tura a beih nasatziate hi sawiin a fiah phâk meuh lo zawk!
3. India hmarchhak kil, ram rualrem lo zetah farming kan operate ve a. Mechanised hleih theih loh khawpa ram rem lo leh reaource that lutuk lohnaah kan che a. Mahni kan inngaihtuah chuan, lung hnualna chhan tur kan ngah viau âwm e. Mahsela, Pu Lawmzuala nun kan en erawh chuan, kan harsatna leh chhuanlam sawite hi a va inthlahrunawm ta êm! Info bikes dintupa, Pu Muantea sawi hi a pawmawm hle, “Mizote hian RAW TALENT chu kan nei tha, kan duhna leh inpêkna (dedication) hi a tlêm thin” a tih kha. Farmer hlawhtling, hausa leh tlo ni tur pawh hian, kan zeihawi sa êm êm. Mahsela, kan TI TAK TAK peih lova, kan lungawina tâwk a hniam fo thin. Pu Lawmzuala inzir peihna level tal hian farming hi zir ila, a tum tlatna leh pan lam neih ngar ngarna tluk hian farming hi buaipui ngat ila chuan, India ram pum huap farmer ropui leh hlawhtling kan tam ngawt ang. Keini chu khawtlang leh kohhran pawl hrang hrangah kan inhmang lâwr dup a, part-time farmer kan ni zauh zauh lek chauh a. Kan inhmanna pawlah khan danglamna thlen tak tak mang si lovin, kan duhtawk chinah kan va buai ve êm êm a. Mahni thlaite enkawlna tur dose leh timing pawh hre mumal lo hian, kan thawveng ve êm êm ngawt a. Mal tlat nun kristianna aiin huho nun kristianna hmanga inawih tlei kan tum chhung hi chuan, smugglers leh mi corrupt-te Paradis kan ni reng ang. Kan ram tân beiseina (aspiration) kan nei sâng lo êm êm pawh hi a mak lo, a siamtha turin keimahni line theuhah kan tang lo êm atin ni. Engpawhnise, mi rinawm leh ngaihsan tlâk tak tak, Zofate zingah hian inthukru tam tak kan la awm ang. Chûngho chu zawng chhuak zel ila, chawisang ila, anni entawnin hma i sâwn zel ang u.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More

Posekaná tráva není odpad: