CLIMATE SMART, SUSTAINABLE FARMING – 19

RK Dawla
Mb 9366095658
1. May thla laihawl – Thing chawrno vanglai a thleng chhova. Kum khat thlaite paw’n hnahpui an chhuang tan a. Thei tang, pangpar tang vih-nun a hun mêk bawk a. Tuihna tipung tham lutuk erawh a ram pum huap chuan ruahtui kan la dawng meuh lo thung. Mizoram hi zîm têah nise, kan climate a diverse êm êm. thenkhat chu Zo-sâng tak tak, kumtluana lum hrehawm awm miah lo a nih laiin, thenkhat erawh lum êm êm, phai khawlum tluk thuak kan ni thung. Hetiang a nih vang hian potential a inang lo êm êm a. Chutih laiin keimahni location theuh mila farming kalpui thiam lamah tan lâk kan la ngai nasa êm êm. A ram pum huapin thlai chi 2/1 kan uar luih luih hi, kan local market thlir miah lo pawhin, kan microclimate diversity thlir hian, thil tlo tur a ni lo ve hrim hrim âwm e. Amaherawhchu, he ram min petu Pathian hian, danglam bik takin kan ram hi a lo siam tih erawh hai rual a ni lova. Foreign leh state dang atanga kan thlai chi lâkluhte rêng rêng hi, Mizorama tha thei thlawt lo chu vâng tak a ni thung. Hetia nih lai hian, Pathianin ram tha min pêk hlutna hriatthiam kawngah erawh a hnam anga kan harh a tul hle.
2. Biodiversity kan nei tha a. Thilto leh nungcha kan nei thahnem êm êm a. Chutih laia a suat leh tichereu zawnga kan khawsa thin erawh a pawi. Kan ramhmul damdawite pawh zawnchhuah a, promote tur tih tham fê a awm ngei ang. Heng kan ramhmul damdawi neihte based zawnga farming kan kalpui theih hun tur a nghahhlelhawm hle, kan intihchhiat a, khua a tlai zawh hma hian. Kan ram sum hnâr tha leh thawhhlawk êm êm tur chu, tourism hi a ni a. Hemi atân hian ramdangte neih ang infrastructure hi kan mamawh kher lo. Kan neihsate hman tangkai zawk hi a pawimawh hle. India hi khawvela mihring tamna ber ram a ni a. India mihring nawlpuiten VISA ngai lo leh sum tam sêng lem lova an rawn tlawh phâk tâwka hnai kan ni. Chutiang atân chuan, farming operation pawh kan herrem thiam a tul hle. Vaiho hian kum tam eizawn nân min hmang tawh a, tunah chuan keini hian vaiho hi eizawn nân kan hman thiam a hun tawh e. An hnenah sawrkar angin kut kan zuk dawh a, khawngaih sum chu min rawn pe ta a. Chûng sum min pêkte chu vai bawk sumdawnghovin thiam takin min rawn lâksak leh a, ngaihtuah chian chuan kan chan hi a chhe riau, a hnam angin han chapo tur rêng kan awm lo, Zofate hi.
3. 2020 atang khan Farming hi ka lût ve tan a. A tirah chuan enge chin tur kha ka bangbo ang reng hle a, chin châk erawh a tam êm êm thung. Mahsela, thlai kan dah luh hmaa thlai kan han zirchian a, kan microclimate leh mahni potential kan han chhût tak tak chuan, thlai chin tur thlan thiam a lo hlu hle mai a, sustain tak tak tur chuan. Kumin hian harh tharna ang reng tlêm testimony ka nei a, chu chu share ve reng reng ka duh a. Kan huan hi 20% chauh kan la vât/enkawl a. A bâk hi ramngaw pangngai a la ni a. Ram zau tak vah chhiat duai duai a, sustainable management practice leh theih si loh kha tul lêm lovin kan hria a ni. Tichuan, kan huan ngaw awmsaah chuan ‘PELH’ hi a tam hle a. Daihlim mamawh thlai a ni a, mau hnuaiah te, thing hnuaiah te a awm thin. Khuarelin a dahsa a nih vangin, kan microclimate leh existing soil profile-a sustain thei ber tur kha a ni tlat a. Hei vang hian, Pelh chu adopt mai ta ila, thlai dang nena dah pawlh kha a rem êm êm tho si a. Hetiang deuh hian kan location theuha khuarel thil awmsa, hman tangkai turte dapchhuah thiam hi kan sustain theihna hnaivai ber a ni tiin pawm bur ta ila, a sual lo ber awm e.