CLIMATE SMART, SUSTAINABLE FARMING – 20

RK Dawla
Mb 9366095658
1. May thla laihawl kan thleng a. Thlai leh thei tiak ilo phun hun a lo intan leh ta a. Kan hma lawkah furpui kan ur chho leh tan dawn a ni. Rannung chi hrang hrang tam lai a ni a, kan thlai leh thei kungte vil ngun hun a ni chho leh mêk a ni. Thlai natna pawh a inlar tam chhoh hun kan thleng chho leh mêk bawk. Hei mai a ni lova, lei chunglang hâng kalral tam hun kan thleng chho tel bawk. Huan kumhlunah chuan kan hmelma lian ber chu lei chunglang kalral hi a ni a. Hei hi thar hlawk lohna, natna leh eichhetu rannung vanga harsatna chi hrang hrang thlentu bulpui a ni tih kan hriat a pawimawh hle. Huan kumhlun bikah chuan, hnim an lo chawr duah hian phili nghal ngawt lo ila. Kan leilung venghimtu an ni tih hria-in dimdawi takin hnim enkawl ila. Kan tana kal vel nuam ngawt kan ngaihtuah vanga hnim kan sâm hneh lutuk hi thlai kumhlunten nuam an ti ve kher lo tih hriat tlat tur a ni. Fur lai chuan, thlai bul keu fai mai a, kumkhata vawi 1 emaw chauh sàm hi leilung leh thlai kumhlunin an ngeih ber – tropical slope-ah chuan. Kan kumhlun thlai an la tê deuh a nih pawhin, fura a bul keu fai bâkah a tam berah vawi hnih chauh huan sàm tur a ni. Hlo tûr phei chu hman rêng rêng loh tur. Thil tha leh tlo engmah hlo tûr hian kan ramah a thlen lo tih hriat tur a ni.
2. Thlai kumhlun bikah chuan a kung bul ngêt hluar hun lai a intan a. Heng ngêt thlentute hi Pu Vana-Sial leh perh-khet kan tih lam chite hi an ni a. Heng ngêt thlentu rannungte hi hmun ualau leh thawveng ngaithei lo tak, hmun biru leh thim ngaina an ni a. Chuvangin, thlai kung bul chu 1ft bial vel fai taka awmtir a pawimawh a. Thlai kung atanga 1ft radius bial piahlam chu hnimin leilung kalral veng turin tha takin khuh sela. Tin, thlai zar buk lutuk thawlh leh lei atanga zârhniam lutukho chu bul takah tan chhum a tha bawk. Tin, ngêt a awm leh awm loh hi thla tin (fur chhung chu) kan thlai bulte monitor ve fo a tha. A ngêt insiam tantir chu tihdam a awlsamin pawi a khawih hman mang lova. Ngêt lung khan thlai kung lairil a thlen hman tawh chuan, a lung kha damdawi hmangin tihlum mah ila, thlaiin an tuar fê hman tawh tho tho thin. Tin, ngêt lung tihhlum nân hian tuibur, sahdah leh khaini tui, inchiuna hriau hmanga ngêt kuaa thun a, hmawlh suih zuma ngêt kua khen phui leh hmak hi a tâwk êm êm, kher chhuah phâk maiah ngêt lung a awm a nih loh chuan. Insecticide hman kher a ngai lo. Ngêt tihhlum nâna insecticide kan hmante hi tûr hlauhawm tak tak, a rim (odour) hîp ringawt pawh hriselna khawih thei thil an ni thin a. Tawngpawng basa ngam ngawt loh a tha ber.
3. Thei tiak kan phun dawnin, chhe tê tala khur laih hmasak a tha a. Duhthusam phei chuan, khur mawngah meihawl nawi dah emaw khur chhunga mei chhêm chilh mai kha a tha hle. A hnawhna turah pawh lei chunglang bâkah chuan thil tawih tawh hman hram hram a tha. Ran-êk tawih tha lo, a ro (dry) a nih vanga thlai phunna tur leilunga kan chawhpawlh thin hi a tha lo êm êm. Ran-êk pawh nise, thlai phunna tur khurah, a tawih tawh lo chu hman miah loh a him ber. Tin, thlai phun rualin bonemeal leh boneash kha, khur hnawhna lei nen chawhpawlh a pawimawh bawk. Bonemeal (saruh herdip) leh boneash (saruh rawh vâp herdip) hian thlai zung titamtu Phosphorus an keng tha a. Thlai phun ruala pêk theih a tha êm êm. Chubâkah, thlai phun zawh hnu-ah thlai bi kha tui tling thei lo tura nemmuk leh haipâwn that a pawimawh êm êm bawk e. Kan thlai phunte hi a tantira kan tihdik loh laklawh tawh chuan, thang thei lovin rei tak an chawrche fo thin. Engpawhnise, kumin fur chu thlai engpawh phun ila, nikum leh kumdang aia hmasawn zawk tum theuh ila. A bultan that chu a zahve zo tluk tiin an sawi thin kha.