CLIMATE SMART,SUSTAINABLE FARMING – 27

RK Dawla
Mb 9366095658

1. July thla kan hmang mêk a, Mizoram pumah ruahtui a rual lo hle a. Ram laihawlah chuan ruahtui a tla tam meuh lova, hmun dangah erawh lo/huan hnathawh tikhaihlak tham zet a sur deuh reng. Mahsela, season a ni miau a, Monsoon ruah hi kan dawng kum tin a. A mil turin kan insiamrem zawk mai tur a ni. Tin, fur khua-in a ken rannung chi hrangte hi a chhe zawng hlira thlir loh a tha bawk. Fur nungcha puangte hi awm lo sela chuan, ecological balance a buai ang a, farmer-te kan buai hle zawk ang. Vaihmite leh thosi, vangvat leh thlai eichhetu pangngang chauhte ngaihtuah lo hian, rannung dang tangkai rawn puang tel vete hi kan ngaihtuah tel a tha. 
2. Pathianin leilung a siam danah hian style chi hrang hrang a hmang a. Mizoram tân pawh kan leilung leh hnim tote châwm turin, Monsoon ruahtui min pe a. Monsoon hian ruahtui chiah min pe lova, thli leh rial, têk, rannung chi hrang hrang leh hnim tote pawh min pe tel a. Heng thil chi hrang hrang, Pathianin min pêkte hi a do zawng ngar ngar a khawsa lovin, a hmang tangkai tur zawng leh hlutna hrethiam tur zawnga ngaihtuahna kan sên thiam a tul hle. Mi tam tak chuan, hei hi kan varpawh lova, mahni hmasial takin kan duh chauh awmtir kan tum a. Tûr kan chelek êm êm a, enge a hlauhawm dan leh a sawhkhâwk kan tuar mêk em tih kan ngaihtuah pha lo fo. Farming hlutna hi sum leh pai zawng chauha kan teh a nih chuan, kan rilru a piangsual emaw ngaihdan dik lo hri kan vei tihna emaw a ni thin. Hah theia kan awm te, enkawl tur ram kan nei te, kan duh ang thlai ching tura zalenna kan neite hi Pathian malsawmna ropui takzet a ni a, sengkhawm tham thlai kan thar lek phei hi chu khawngaih chunga khawngaih lehchhawnna kan chang a ni zawk. Mi tam tak, hah tura thawk thei lo te, enkawl tur ram nei lo te, duh ang thlai ching tura zalenna nei ve lo te, thlai tharchhuah nei thei lo tura khuarel chhiatna leh rannung or natna lêngin a tihchhiat sang tam tak kan khawvelah hian an awm a ni. 
3. Furpui vanglai a nih miau avangin, hnim a chawr chak a. Hnim hian thlai kung bul thawveng tur a hliah thin avangin a kung bul ngêt a thleng sam hle. Hei vang hian, thlai kung bul tê chu fur zualpui thlen lai hi chuan, thlai kumhlun pawh nise, tihfai a pawimawh êm êm. Leia hnahthel thâi a, chaw zawng thin savate leh ngêt lung zawng thin sava (thloh chi hrang hrang)-te phei chu an hlu êm êm. Thlai kumhlun huan neite tân phei chuan, huan chhung leh vàu chhûng remchang laiah sava tlan chi theirah chi hrang hrang phun tel nachâng kan hriat a hun tawh hle. Hei bâkah hian sava bu turte pawh thingphel kilhpumin thingah an khai thin a, heng hi savate hian an luah ve duh riau a. Huan chhunga rannung hnawksak thianfaitu, savate hi silai chi hrang hrang leh thangkam ang zawng chauha kan hmachhawn thin hi sim a hun tawh hle. Chutiang bawkin, rûlte pawh, kan hmuh apiang that mai lovin, kan thlaite eichhe thintu sazu min suatsaktu an ni a. Kan râp êm avanga thah ngawt khan thlai eichhetu zuva kan tipung mai mai zawk a ni. 
4. Pathianin kan chên nân he kan ram hi min pe a. Maurawkela hunlai ata tawh vawiin thlenga kan ram leilung leh ramngawte awmdan tura Pathianin a duan dan hi hrethiam tura kan chîk peih leh zir peih a hun hle. Ramngaw kan thiat thâwr a, kan duh duh kan chingin kan phun a, kan duh anga awm turin kan beisei a, bawlhlo chi hrang hrang leh tûr tinrêng nên mahni hma kan sial ta a. Ramngaw awmsa zahna nei lêk lovin, ‘ka theih tak emaw’ tiin hlâwk kan tum ta nawk nawk a. Kan tisual a, kan hlawk lova, kan buai fo a nih hi. Huan siam kawngah hian a siamtu Pathian zai hi ngaiin, hlâwk phut ni lovin tlo-na hi ngai pawimawh zawk ila, kan tu leh fate tân ram tha zawk leh hmakhaw êng zawk kan hnutchhiah ngei ang.