CM-in Bharat Scout & Guides chawimawina sang a dawng

Uttar Pradesh state khawpui, Lucknow-ah Bharat Scout & Guides kum 60-na lawmna leh 19th National Jamboree a ruala hman a ni a. President of India Droupadi Murmu chuan hmanpuiin, Mizoram chief minister Lalduhoma hnenah Bharat Scout & Guides chawimawina sang ber, Silver Elephant Award hlan a ni.
Chawimawina lehkhaah hian Lalduhoma hnena he chawimawina an pek chhan chu, Bharat Scout & Guides hmalaknaa a thawh that chungchuan vang (most exceptional service) a ni tih a inziak.
Chief minister chuan, Mizoram mipui, khua leh tui tha, ram leh khawtlang tana inpe zo em em, midangte nena thawhho thiam, mahni inphata midangte tanpui tura inpeih reng thinte vangin he chawimawina hi pe nia a hriat thu sawiin, “Keima mimal hlawhtlinnaah ka ngai loa, Mizoram mipui hlawh chhuah zawk a ni,” a ti. Mizorama Bharat Scout & Guides hotute leh Sports & Youth Services department thawhrimnaah lawmthu a sawi a ni.
He chawimawina hi Mizo pasarihin an lo dawng tawh nia sawi a ni a. A dawng hmasa ber chu Hrangthanga (L) niin kum 2000 khan a dawng a, chief minister hmaa a dawngtu hnuhnung ber chu Lalrosangi niin, kum 2017 khan a dawng.