CM-in Luangmual mamawh enpui Zemabawka in chimna a tlawh

Luangmual khawtlangin an veng thlanmual panna kawng siamthat leh an playground tihhmasawn an dil leh SEDP hmanga thawh vengchhung kawng siamtharte chu Inrinni khan chief minister Zoramthanga chuan a hmunah a enpui.
Chief minister hian Luangmual Thlanmual tlawh hmasain a panna kawng tih zauh leh concrete pavement-a a kawng chhun a tulna a enpui a, hemi hnu hian Luangmual Tlanga an playground, phullem phah an dil hmun a tlawh. Playground leh YMA Hall inkara kawngkal, SEDP atanga tha taka concrete pavement an siam thar pawh a en nghal a ni.
An hmunhma a ensak hnua khawtlang hruaitute leh tlawmngai pawl hruaitute nen an inkawmnaah chief minister chuan Luangmual khawtlang mamawh thil chu sawrkarin theihtawp chhuahin a ngaihtuah sak dawn tih a hrilh a. A tul angin a changtu department-ten an rawn enzui nghal tur thu a sawi. Chutihlaiin inthlan hmachhawn mai tur kan nih tawh avangin tun maia chinfel nghal a theih tawh rih loh tih sawiin, sawrkar tharah hun thate an nei a nih chuan an bawhzui thuai thei turah a ngai tih a sawi a ni.
Zemabawk Bethel Venga KC Zauva te chhungkaw chenna in chu August 18 tlai dar 4.30 vel khan a chim a, bialtu MLA, chief minister hian Inrinni khan tlawhin, a hmunhmate sak leh theiha thenfel a nih hnu ah, a tul anga inpuih a nih tur thu in a thlamuan.
Tuna in tlu te kawt kawngpui kal zelin a piahlawka sawrkar sak mek futsal ground a chhun avangin, futsal ground panna lamlian atan tha taka la siam tur a nih thu a hrilh bawk.
KC Zauva te hian an in, Assam type sak thar hi August 16 khan an luahlut, August 18 tlai lam ruahsur lai khan a chim a ni. A chim lai hian an chhungkua member pali leh an hnathawktute an awm a, hliam nei hlawm mah se, an nunna atana hlauh-thawnawm tham harsatna an tawk lo nia sawi a ni.