Kum 2023- 2024 sawrkar kum tawp ni – March 31 khan chief minister Lalduhoma chuan Aizawl North leh South Treasury tlawhin an hnathawh a enfiah a. Buaina awm loa tha taka treasury khal theih a ni chu lawmawm a tih thu a sawi a ni.
March 31 hi Pathianni a nih avangin MNF party chuan chief minister-in hemi nia sawrkar thil khawiha official-te a tibuai tel chu tha lo an tiin, Kristian-te ni pawimawh zah turin an ngen tih an sawi.
MNF Gen. Hqrs. thuchhuak chuan, chief minister hian Easter Sunday khan adviser to CM (Finance) TBC Lalvenchhunga leh official dang tawiawmna in Treasury a tlawh tih an sawi a. Chief minister, kohhran upa lehnghalin Pathianniah pawh Kristian-te ni pawimawh bik – Easter Sunday bawhchhia a, sawrkar office tlawha an hnathawh a enfiah chu Mizorama la thleng ngai lo a ni tih a sawi.
‘Pathianni ni lo, office enfiah leh tlawh hun tur a tam tehlul nen, Pathianni kher office tlawh nana a hmang duh hi mak kan ti a. Mizoram CM-in Kristianna a lak thutak loh zia leh a lak lap zia a langchiang hle a. Pathianni zah lo CM kan nei hi a pawi hle,’ a ti.
Inthlanpui leh thil pawimawh dang Pathiannia ruat a nih thin dodala Mizo Kristian-te kan lo tanrual tawh thin laiin, CM berin Pathianni zah lo taka chet a la ta mai chu pawi an tih thu MNF hian sawiin, ‘Hun kal zel turah Pathianniah thil pawimawh India sawrkarin a rawn ruat leh a nih chuan kan CM hian mawh thuk takin a phur dawn a. Kristian CM a nih hrerengin, tunhnuah chuan Pathianni zah tawh turin Pu Lalduhoma hi kan chah a ni,’ thuchhuah hian a ti.
CM-in Pathianni a zah lo – MNF
Get real time updates directly on you device, subscribe now.