CM-in police a hmusitah kan ngai Kaisannaa exam dan a fel lo – MNF

Assembly Session-a chief minister-in police-te chungchang a sawi dan chu a hmusit nia an ngaih thu MNF party chuan an sawi a. Tunhnaia sub inspector (Armed Branch) a kaisanna tura department-in exam a buatsaihah thil fel lo a awm nia an ngaih thu an sawi.
MNF Gen. Hqrs. thuchhuak chuan, Mizoram Police huaisen tak tak, thih huama Assam Police pawh kap ngamtute chu Assembly Session-ah chief minister-in hmusit takin ‘kut vung ber bur leh ke vung ber bur’ anga a chhuah bakah rintlak awm lo ang maia a chhuah chu pawi an tih thu a sawi.
‘CM thusawi hi Mizoram Police hmuhsitna leh a changtu minister pawh a dahhniamnaah kan ngai a. An thatna lam hmuhpui loa, an zinga mi tlemte te dinhmun an zavaia dinhmun ang maia Mizoram rorelna sang bera a sawi chhuak hi a pawi kan ti. Kan police zawng zawng deuhthaw hi ram tana nun hlan ngam an ni tih leh hotute thupek anga huaisen em em thin an ni tih hi MNF ngaihdan a ni a. Hnamdangte pawhin min zuam theihna tura police-te a chhuan chhe zawnga sawi hi a pawi a. Hetiang thu hi sawi nawn tawh lo turin chief minister hi kan ngen a ni,’ a ti.
Hetihlai hian Sub Inspector Armed Branch lama departmental promotion exam (DPE) ah thil fel lo tak a awm nia an hriat thu MNF hian sawiin, kum 2019 leh 2022 thlenga DPE-a SI-a kaisan theihna tur an buatsaihah complaint leh fair lo thei engmah a awm loh laiin, kumin February-a buatsaihah erawh, exam turte inhrechiang tak, kum 20 chuang service ho tawh leh havilder ni tur pawha course kal ho vek, SI-a kaisanna tura an exam an neihah ti ve mai mai leh tel ve hrim hrima an hriat an promotion ta nual tih a sawi.
‘Practical exam laia tih ngaihna hre lo leh tisual nasa em em kha hlankai zawkah an tang a. Silai thiah darh ngaihna hre miahlo leh parade command pawh tisual chiang em em, Board officer-te pawhin an hrilhchawp an tling ta daih a. Physical lama tha tawk lo, operation duty neih ngai pawh nise an tirh ngam loh tur, taksa lama fit tawklo te an la kaisang a, sawrkar thar hnuaia exam hmasak ber hi a tha tawk lo hle niin a hriat a, tling leh tha tam tak an awm laia min venghimtu tur berte induhsakna uchhuak tak hmanga ZPM sawrkarin Home department a suasam ta mai hi a pawi takzet a ni,’ MNF thuchhuah hian a ti.