CM sawisel vanga thubuai nei an awm ve loang – Zoramthanga

Induhkhawp lohna thil avanga social media lama ama chungchang sawichhuaktute umzui leh thubuai siamsak ang chi chu a ti ve ngai dawn lo tih chief minister Zoramthanga chuan a sawi.
Tunhnai Manipur buaina kaihhnawihah Zohnahthlak tlangval pakhat chu an state chief minister N Bireng Singh laka lungawilohna social media lama tih lannaah a tel avangin thubuai siamsaka man a ni a, May 4 khan court atanga jail lama dah an tum laiin Meitei mi thenkhatten an phurhna lirthei tidingin, amah hi an pawtchhuak a, an chilhlum nia sawi a ni. Hei hian National Human Rights Commission beng a thleng a, Manipur sawrkar leh sawrkar laipui chu thil thlen dan chhuichiang a, hma la turin a ti tih sawi a ni bawk.
Hemi chungchangah hian Mizoram chief minister chuan state mipuiin an lungawilohna an sawichhuah vanga in man leh thubuai insiamsak ang chi chu Mizoramah a thleng ve dawn lo, tiin, “Mizoram chief minister ka nih angin, ram enkawlna kawnga sawiselna leh duhkhawp lohna a awm changa kawhrawn leh sel hlawh ber pawh ka ni ang tih ka hria. Amaherawhchu, Mizo thalai ram leh hnam veitute lakah hetiang thil hi Mizoramah chuan a thleng ve lo ang,” a ti.
Ram mipui tana rawngbawltu an nih angin, chief minister leh ram hruaitute chu sawisel theih loh an ni loa, ram tana mipui thahnemngaihna au aw chu an ngaithla reng a; ram leh hnam an veina, ram an hmangaihna avanga an thahnemngaihna lo dawngsawng turin an beng an chhi reng thin tih Zoramthanga hian a sawi. “Chutih rualin kan thahnemngaihna chu ram leh hnam hmasawnna tura awmze nei leh tangkai tur thurawn tha ni zel thei se,” a ti.
Ram mipui tan, thalaite tan ram hmasawnna nasa zawk thlen turin theihtawp an chhuah zel dawn tih a sawi a. Harsatna avanga an tum ang a hlawhtling nghal theilo a nih pawhin, an tum tihlawhtling turin nasa zawka ke pen zel an tum tih a sawi bawk.