College pathumin tanghoin ram huap seminar buatsaih

College pathumin tanghoin
ram huap seminar buatsaih
Govt. Aizawl North College, Govt. J Thankima College leh Govt Mamit College-a Mizo Department tangho chuan “Zofate tana sulsutu hmasa – Upa Thanga” tih thupui hmangin Zirtawpni khan Aizawlah ram pum huap seminar an buatsaih.
He hun hmanpuitu MLA Dr Vanlalthlana chuan kan mi hmasate sulhnu chu hnamdangten an rawn ngaihlu dawn loa, keini’n kan pho chhuah thiam a, kan ngaihhlut thiam a pawimawh, tiin, kan lehkhabu hlui rotling leh tha tak takte chu uluk taka college library-ah te, a hmun bik siama kan vawnthat a pawimawh tih a sawi. Upa Thanga sulhnu zir atang hian zir chhuah tur tam tak an neih ngei a beisei tih sawiin, chumi zirchhuak thei turin seminar chhimtute a chah tih a sawi.
MLA hian Upa Thanga Hauhnar chanchin ziahna lehkhabu a tlangzarh nghal a. Thuthehtu Prof Laltluangliana Khiangte leh Upa Thanga Hauhnar thlahte aiawhin Lalbiakzama, MPS (Rtd) ten thu an sawi bawk.