College zirlai zingah UGC phut ABC ID nei lo an tam

University Grants Commission-in a beisei ang Academic Bank of Credit (ABC) identification nei vek tur a nih laiin Mizorama college zirlai zingah sakhuana thil avangin zirlai sang hnih chuangin an nei lo.
Mizoram University hnuaia under graduate, 2023 batch atang chuan National Education Policy (NEP) 2020 hman tan a ni a. Sawrkar laipui Ministry of Education-a University Grants Commission (UGC) beisei angin under graduate 1st semester zirlai zawng zawng chu ABC ID nei vek tura tih an ni. Result chhuah thlenga ABC ID neilote chu an grade card hrensak niin, ABC ID an neih hma chu pek chhuah loh tura tih a ni.
ABC ID siam tur hian Aadhaar neih ngei ngei a ngai a, sakhuana avanga Aadhaar neilote chu UGC hian ngaihnathiamna a nei hran loa, zirna chhunzawm zel tur chuan Aadhaar card an nei ngei tur a ni, tih chu an thuchhuak a ni. UGC hian ABC ID neilo zirlaite chu zirna an chhunzawm zel remchang loah a ngai a ni.
Mizoram University Examinations Department chuan February 6 khan under graduate 1st semester regular NEP 2020, Odd 2023, November – December 2023 chhunga exam result a tichhuak a. NEP 2020-ah hian zirlai tinin subject paruk zel an nei a ni. 2023 batch atangin NEP 2020 hi hman tan a ni.
Tuna ABC ID nei lo hi zirlai 2546 an ni a, under graduate zirlai exam zawng zawng atanga chhutin zaa 42.13 a ni.
ABC ID neilote hi an neih hunah anmahni college theuhah in report in, principal-in MZU Examinations Department-ah format hman lai angin a dilsak dawn a ni. ABC ID nei rih lote result pawh tun tumah hian tih chhuah sak vek tho an ni.

UG 1st sem result:
Stream Candidate Zat Exam Pass Pass%
BA 5047 5003 2521 50.39
B.Sc 620 619 399 64.46
B.Com 372 372 270 72.58
BH 20 20 7 35
BSW 29 29 14 48.28
Total 6088 6043 3211 53.14

MZU hnuaia zirlai ABC ID neilo zat:
Bachelor of Arts – 2245
Bachelor of Science – 218
Bachelor of Commerce – 72
Bachelor of Home Science – 6
Bachelor of Social Work – 5
Total – 2546