Congress-in MLA chan mai thei

Term kal laiah MNF-in MLA pakhat an chan tawh a,
Congress party pawhin an MLA pakhat an chan mai thei.
Palak bialtu MLA KT Rokhaw chu party atangin a chhuak mai thei nia sawi a ni a, mahse thil tihfel hmana chi a nih loh avangin, term tawp hunah emaw a tawp dawnah emaw thil a chian a rinawm tih thu dawn a ni.
KT Rokhaw hi a chhuak a nih chuan MNF-ah a lut ang tih rinna a awm a, MNF hian inthlanpui lo awm turah a bial ngaia dintir leh an tum nia sawi a ni.
Congress party pawhin inthlanpui lo awm tura an party candidate tur an ngaihtuah mekah Palak biala ding tur chungchangah harsatna an nei nia sawi a ni a; an MLA dang palite chu an bial ngaiah an ding dawn tih a chian laiin Palak bialtu hi an candidate leh dawn em tih te, a insawn mai ang em tih te ngaihtuah chunga ro an rel a ngai tih thu dawn a ni.
Mara Autonomous District Council (MADC) sorkar, MNF leh Congress tang dun sorkar thiah a nih atangin Palak bialtu MLA dinhmun hi a chiang lo tanah ngaih a ni.
Palak bialah hian MDC 14 an awm a, inthlanah BJP 11 an tling. Chumi hnuah Congress MDC pakhatin BJP a zawm a, Palak bialah hian BJP MDC 12 leh MNF leh Congress MDC pakhat ve ve an awm mek.
Autonomous district-ah hian MLA inthlanah MDC-te an pawimawh thin a, chuvangin Palak bialtu MLA tan hian Congress party atanga din hi a him lo thei tih chu ngaihdan tlanglawn a ni.
Thudawn pakhatah chuan KT Rokhaw hian BJP-a luh a duh lo a, a duh loh bakah BJP-ah hian Palak biala din tum mi pathum an awm sa. MNF-ah pawh hian PP Thawlla, K Riachho leh M Chakhu te hming a ri.