Congress-in MNF hnenah leiba tam tak an hnutchhiah – ZPM leader

Congress party chuan an sawrkar laiin sum enkawl thiam inti hle mah se, MNF sawrkar hnenah leiba tam tak an hnutchhiah tih ZPM leader Lalduhoma chuan a sawi.
Thawhtannia Phullena ZPM Chalfilh Joint Block Party Meet a hmanpuinaah Lalduhoma chuan sawrkar hmasa Congress chuan an hun laiin sum enkawl thiam inti hle mah se, MNF sawrkar kha leiba tam tak a hnutchhiah tih a sawi. Leiba chu GSDP atang zela chhut a nih avangin, tuna chief minister-in kan leibat zat a sawi thin dan chu chhiarkawp dik lo a ni, tiin, “Sawrkar lai mekten heti zawnga mipui an zirtir hi thil dik lo a ni. ZPM a sawrkar chuan kan leiba tihniam turin theihtawpin tan kan la dawn,” a ti.
‘Pathian leh kan ram tan’ titu MNF party-in NDA a zawm tlat mai chu mak a tih thu ZPM leader hian a sawi. “Kan hnam leh kan sakhuanaah hian a mual boin an bo a ni. Tharum hmanga Kashmir an awp beh dante ngaihtuahin, Mizoramah pawh Article 371G harsa taka kan sualchhuah hi an rawn namthlu leh duh mai loang tih a sawi theih loh a; term khat an sawrkar leh a nih ngat chuan Mizoram tan pawh hian a him lo hle tawh ang. Chutiang sawrkar thlawptute chu MNF party an ni tih hi Mizo mipui hian kan hriat a ngai,” a ni,” a ti.
Hriselna chungchangah Mizoram chu cancer tam lamah pakhatna kan ni, tiin, “Kan mipate an thi hnem em em a, hengte hi sawrkar anga hmalakna tur tul em em a ni. Mahni intihlum kan tam chho zel a, India ramah nupa inthen tamna ber kan ni te, chutih laia inkhawm uar ber hnam kan ni bawk si te hi thil inhmeh lo a ni a, Mizoram politic-ah hian Pathian ram a thlen a tul a ni,” a ti.