Congress inthlang tur inpawt na

Thawhlehni hian Congress party an inthlang dawn a, party mite an tang hle. Party pawn atang pawhin an thawm a hriat theih.
MPCC elected OB tur thlannaah thlur hnihin an kal a, an inpawt na hle. Thlur hnihte hian lamtang an zawng nasa a, khaw hrang hrangah an zin kual.
Executive member tur an thlang dawn bawk a, elected OB tura an inpawt hian hei pawh hi thui tak chu a nghawng nia sawi a ni.
Elected OB-ah hian president, vice president leh treasurer tur an thlang dawn a, lehlamah president atan Lal Thanzara, vice president atan Lalnunmawia Chuaungo leh treasurer atan Dr Lalmalsawma Nghaka te an awm a; a lehlamah president atan Zodintluanga Ralte, vice president atan C Ngunlianchunga, treasurer atan Lalrindika Ralte te an awm.
Thlur hnihte hian theihtawp an chhuah a, Mizoram hmun hrang hranga an party mite pawh campaign-in an tlawh. Thu inchuh lianpui an nei a; Lal Thanzara te pawl hi official nominee tia sawi an ni a, Zodintluanga Ralte te pawlin an ni lo an ti ve thung. Lal Thanzara te pawl hi party-in official nominee atana an thlan chu an ni ngei a, a lehlam pawl hian a thlan dan a dik lo a, mi hriatpui lohvin tute emawin official nominee ni turin an thlang an ti thung. Chumi hma chuan party chhungah neuh neuh a awm tawh a, 2022 Mizoram inthlanpui pawh kha inlungrual lovin an hmachhawn a, chung chu official nominee chungchangah hian a alh chhuak a, a alh ta zel tih chu thlir dan tlanglawn a ni.
Thu dawn danin, tute nge tling ang tih chungchang thlir nan vote a tla tha ang em tih a pawimawh a, vote hi a tlak that a rinawm. Thlur hnihte an tan em avangin voter an kal that a rinawm tih thu dawn a ni a, mahse vote tla tha hi tute zawkin nge hlawkpui ang tih chungchangah thlir dan a inang lo.
Elected OB bakah executive member tur mi 60, mipa 50 leh hmeichhia 10 an thlang dawn bawk a, hetah hian mipa 84 leh hmeichhia 16-in hming an pe.
An president ni lai Lalsawta’n elected OB atan hming a pe lo a, chawlh a tum thu a lo sawi tawh. Executive member atan pawh a hming a pe lo.