Congress leh AAP campaign dun

MP inthlanpui neih turah AAP Mizoram chuan Congress candidate an thlawp dawn a. Inrinni khan Congress candidate Lalbiakzama tan Aizawlah street campaign an nei.
MPCC treasurer Dr Lalmalsawma Nghaka chuan MP thlan turah pawl pahnih – India danpuiin hnam hrang hrang leh sakhaw hrang hrang min humhalhna hnuaiah zalen taka Pathian kan biak zel duhtu party intelkhawmna INDIA Bloc leh India ram chu Hindu lalna rama siam tum BJP kaihhruai intelkhawm an awm dawn tih a sawi.
“Hnam leh sakhaw tin ten tih dan thin kan neih nuaibo a nih theih nan Uniform Civil Code dan siam tumtute an ni. MNF party chuan chu Hindu lal ram din tumtute tha tih chak tum awm fahranin NDA an zawm tlat a. BJP kaihhruai sawrkar India rama a din leh theih nan an campaign mek. BJP sawrkar a pian nawn leh chuan India rama democracy hi nuaiboin a awm anga, kan zalenna chhuhsak kan ni ang tih hlauhawm tak a ni,” a ti.
Tun MP inthlan turah tunhma lama Mizoramin a la hriat ngai loh, party pakhat ‘bak’ an rawn piang thar tih Dr Lalmalsawma hian sawiin, “Chung leng leh hnuai lengte indo lai khan lamtang nei ngam lo bak kha a chan tha zawk zawk lamah a phe a phe a, bak anga dinhmun chiang lo nih hi kan duh ngai lo. Pathian thu pawhin lum law law emaw vawt law law emawa awm turin min zirtir a ni,” a ti.
Kolkata khawpuia mipui nuai 40 chuang punkhawm thu chhuang taka sawi thintu khan ngaihtuah let se, khang mipui kokhawmtu party-te kha tu lamah nge an tan tak tih zawtin, “Mipui zalenna humhim turin huai takin INDIA Bloc-ah telin, lungrual takin BJP leh a thawhpuite paihthla turin hma an la ho mek a ni,” a ti.
AAP Mizoram president Andrew Lalremkima chuan BJP-in thiam takin democracy nuaibo a tum mek a, opposition party-te chungah pawh an mit a kham hle tih a sawi a. Congress party leh AAP party chu a tihbuai nasat ber an ni tiin, “India ramah sakhaw zalenna duh leh duh lo kan inel mek a, tuna kan dinhmun thlir hian tan zawng nei ngam loa awm hi a zahthlak takzet a ni,” a ti.