Consumer-te humhalhna tur rel

District Consumer Protection Council Saitual chu a vawikhatna atan Thawhtanni khan an chairman, bawrhsap Dr Lalngura Tlau hoin an thukhawm a. Council hmaklakna tur leh hriat tur pawimawh inhrilh a nih bakah thil tul dang sawi ho a ni.
Chairman chuan mipuiin kan dikna chanvo kan hriat tawk loh thin avangin sumdawngten sum tam tak min eisak fo thin tih a sawi a. Mahni dikna chanvo theuh kan hriatchian theih nan veng/ khaw tinah Consumer Union din tha a tih thu a sawi.
“Mipui hi consumer leh service provider kan nih kawp fo avangin buaina leh harsatna tam tak a awm thin a. Chutihrualin inbumna kawng tam tam tak laka mitinin kan dikna chanvo theuh kan humhalh theih nan theihtawp chhuah tlang ang u,” a ti.
Council member-te atangin consumer-ten harsatna an tawh thin an sawi bakah Legal Metrology awm tura hma lak, mipui hnena awareness neih dan tur, ration card leh eirawngbawlna gas chungchanga harsatna awm thin chinfel dan turte rel a ni.
Thutkhawmah hian SDO (Sadar) Lalthakima Chhangte, DCSO Saitual Zairemkima, line department aiawh, Mizoram Merchant Association, Saitual District Consumer Union aiawh bakah NGO aiawhte an tel a ni.