Contract hna lian ho Mizote kuta a luh theih dan kan dap -CM

Mizorama contract hna thawh tur, a liantham deuh pawh Mizoten an thawh ve theih dan tur an dap mek tih chief minister Lalduhoma chuan a sawi. Contract hna chu tunah rih chuan a ni ngai ho ngawr ngawrin an thawk nia a lan thu chief minister hian a sawi a. Contract thawk duh tan an luh theih dan awlsam zawn a ngai a, chumi tur chu duangin an inchingfel mek tih a sawi. “Third class (contractor) atanga rawn tan chho a, contract-a ei zawng duhte contractor an nih theih dan kawng awlsam kan zawn a ngai a, kan inbuatsaih mek,” a ti.
Mizoten sub contract kan thawh atanga work plan awm chho zelah, hna lian kan thawh dan tur, Mizorama hna lian zawng zawng Mizote kuta a luh tir a, tender pawh chhang ve thei tura ruahman chu an sawrkar tum a ni tih Lalduhoma hian a sawi a. A kawng khar zawng ni loa, a hawng zau zawnga kal an tum a. Party worker pawhin an dil ve chuan an thawk thei vek dawn tiin, zawhna a chhang.
Tuna sawrkarin consultancy firm a neih zawng zawng chu kumin March 31 hian an hun a tawp dawn a, an tam lutuk tawh a, an titawp vek dawn tih sawiin, April atangin in-register na hun an hawng leh dawn tih a sawi bawk.
Mizorama investment ti duh company leh industrialist an tawng mawlh mawlh tih chief minister hian a sawi a. Chutihlaiin, a pawnga taka lo ‘welcome’ chu tha an ti lo tih sawiin, “Hetiang lama kan tawnhriat a la zau tawk loa, tualchhung entreprenuer-te an dip ang tih kan hlau a, an ni kaihruaitu atan leh hna siamtu atan kan duh bawk si. A principle-a ngaihdan kan siam chu, tute pawh, Indian company emaw foreign company an ni emaw, state budget chhung rawn ei hek tur chu tumah kan welcome lo. kan budget-a dah sa sum ei hek loa, kan ram tana tha tur project an rawn din theih a nih chuan, chumi ti thei tur chu kan lo tuipui ang che u, kan ti,” a ti.
Project lokal reng reng, nakina a maintenance leh repair kan tih sak leh hleihtheih loh tur, man power pawh kan pek theih loh tur, vawi khat sum a lokal avanga kan tih hluai ang chi, sum siamna atana hman a, a hnua hluihlawn leh ang tam tak a awm tawh tih chief minister hian a sawi. “Hetiang chi hi kan duh lo. Amaha intodelh thei tur kan zawng hram hram a ni,” a ti.