Contract thar ziak Takehiro

Japan tana game 41 khel tling ve tawh Arsenal defender Takehiro Tomiyasu chuan a club vawn laia kum hnih dang khelh chhunzawm turin contract thar a ziak a, an inremna ang chuan north London club tan kum 2026 thleng a khel ang a, pawl pahnih remtihnain kum khat atan pawhsei theih a ni ang.
Kum 25 mi Japan international Takehiro Arsenal contract ding lai chu kum 2025-a tawp tur a ni a, inremna tharin Gunners thuam hak hun a tirei dawn ta a ni.
Kum 2021 khan Tomiyasu hian Italian club Bologna chhuahsanin Arsenal a zawm a, kha mi atang khan inelna hrang hrangah Gunners tan match 73 a khel tling tawh.
Arsenal manager Mikel Arteta chuan Tomi rilru puthmang fak chungin amaha theihna leh chakna awm inkawp chu hmuh hmaih theih a nih loh thu a sawi a, an club a zawm tirh phat atang khan an Asian defender chu squad chhunga mi zawng zawngin an ngaina nghal vek a, squad member pawimawh a nih nghal tih a tarlang tel.
Back four khawi hmunah pawh khel thei Tomiyasu hian season kal lai inelna hrang hrangah a team vawn lai tan game 20 khel tling tawhin, nikum October thla Premier League-a singa faia Sheffield United an sawp tum khan Gunners tana a goal hmasaber a lo khung fel tawh a ni.
Khelh 10 hmabak la awmah Arsenal hian goal difference hmangin Premier League table-ah hma an hruai mek a, kum 2004 hnu lama an title hmasaber tur an beisei mek a ni.
Thla thar mai hian Champions League quarter-final lamah Bayern Munich an hmachhawn bawk ang.