Coop society hmasawnna tur sawiho

District Cooperative Development Committee Serchhip chu an chairman, bawrhsap Paul L Khuma kaihhruaiin Nilaini khan an thukhawm.
District cooperative officer Serchhip sawi danin, sawrkar laipui Ministry of Cooperation chuan district tinah Committee hi din turin a ti a. Serchhip district-ah pawh din niin, tun hi tum thum an thutkhawmna a ni.
Tunah hian Serchhip district-ah cooperative society 120 an awm a, an zingah hian Ministry of Cooperation-in a ngaihpawimawh em em, Multipurpose Primary Agricultural Credit Society (M-PACS) 8 an awm. Society-ten hma an sawn zel nan sawrkarin hma an lakna tur thil hrang hrang 25 a ruahmanah district chhunga society-te pawhin an huang an zauh zel a pawimawh tih sawi ho a ni a. Hemi hlawhtlinna atan hian department hmalaknaah society-te hmasawnna a theih anga ngaipawimawh theuh turin an inchah bawk.
Serchhip district-ah hian cooperative society la awmlohna khua engemawzat ala awm a, heng khuaah hian department dang nen tanghoin cooperative society din a nih theih nan DCO leh a thawhpuiten hma lo la zui se, an ti.