Corporatize turin P&E inruahman

Corporatize turin P&E inruahman
Power & Electricity minister F Rodingliana hoin department hotute chuan ‘corporatization’ chungchang ngaihtuahin Zirtawpni khan an thukhawm a, P&E department hmasawnna atan corporatize tura chak taka hma lak rel a ni.
Inrelbawlna tha zawk a awm theihnan corporatization kalpui chu ZPM sawrkar manisfesto zing ami a ni tih Power minister hian a sawi a. Hei hian mipui leh sawrkar tan kalphung tha zawk a thlen dawn, tiin, chak taka bawhzui turin department officer-te a chah.
Thutkhawmah hian sawrkar laipui Ministry of Power-in state-a Power department corporatize dan tur inkaihhruaina a siam thlirho niin, hemi zulzuia ‘unbundling’ leh ‘corporatization’ kalpui dan ruahman a ni.
Ruahman ang chuan unbundling tih hmasak tur niin, P&E department chu thuang thum – Generation, Transmission leh Distribution-a then a ni ang. Heng strategic business unit (SBU) hrang hrang hian an chanpual theuh an enkawlin an thawk tawh dawn a. Hemi mil hian department restructuring kalpui tum a ni. A theih ang angin outsourcing leh franchising nasa zawka kalpui nghal tum a ni.
He ruahmanna hi sawrkar laipui duhdan leh Electricity Act 2003 sawi anga siam niin, hnathawh tur bik chang tura insiamthar a nih chuan, SBU hi anmahni hna theuhah an insawrbing thei anga, inrelbawlna tha zawk neiin mipui tan service tha zawka thawk thei tura ngaih a nih bakah AT&C loss (power bo thlau) pawh tlahniam thei tura beisei a ni bawk.
Department hmasawnna tura sawrkar ruahmanna awm hi department chhunga engineer-te pawhin lawmawm an tih thu he thutkhawmah hian an sawi a, chak taka bawhzui nghal tura rel a ni.