Dr. C. Lalengkima
-- Advertisement --
Mi tam tak chuan Mizoram kohhrante hi corruption haw vak lo, corruption pawh do ngam lo ni hian an hre deuh thin a. Mi tam takin kohhran an sawtna ber leh kohhran thlarau lam nun a chauh nachhan hi heng eiru leh thil dik lo tite hian inphen nan kohhran an hman vangah te an ngai thin. Khawnge tun tum chu Mizorama kohhran lian ber Synod-in eiruk a dona kawng hi in bihchiang teh ang.
Corruption dona chungchangah Synod a ngawi thin reng em ni?:
Mizoram Synod hian kohhran pawn lama rawngbawlna khawtlang nun khawih thil lama hma latu tur, Synod Social Front hi kum 1979 khan a din a. A awmzia chu a din atanga kum 85 hnuah Synod chuan khawtlang lam hawia rawngbawlah hian ke a pen ve tak tak chauh a tih theih awm e. Social Front a din atanga kum thum hnu lek kum 1982 khan ‘Corruption Do Kum’ atân a puang a. Heng hun lai vel hi a ni mai awm e, kohhran hruaitu pakhat thusawi lar deuh, “Corruption do chungchangah khatih laia Chief Minister kha kan hmu a, corrupt officer-te hrem turin kan ngen a. Ani chuan kan hrem apiang in lo phuar/thunun ve zel ngam ang em a ti a, kan zuzi ta deuh a’ tih a sawi, an sawi chhawn fo thin hi.
Corruption an do atanga kum 24 hnu, kum 2006-ah ‘Corruption that lohzia inzirtîr ni se’ tiin hmalak a ni leh a. Revival speaker-te nen tangkawpin ram pum huapin beihpui thlak a ni. Chumi hnu kum 16 a liam leh kum 2022-ah Synod inkhawmpuiah corruption do chungchanga hma la thar leh turin thu a ti tlu leh ta a ni. Corruption hi tun kum 40 (1982-2022) chhung hian vawi thum do/inzirtir an ti tlu tihna a ni a. Heti khawpa sual lian leh kan buaipui em em mai, a ka kaw nazawngin an sawi thina hma an la nasa tawk lo, an la zing tawk lo hi Synod hian corruption hi a haw tak tak lo, corruption chungchangah Synod a ngawi an tih pawh hi a mak hran lutuk lo. Synod lam hian theihtawpin hma kan la an ti a nih pawhin an member-te hian la nasa tawk hmuh hian kan hmu lo ni hian a lang a, ngaihtuah a ti thui viau a ni.
Tin, thil mak ve deuh chu Synod Social Front-in a tih tur, hmalakna tur point 15 an ziahchhuah zingah hian corruption dona lam hawi emaw a demna lam hawi emaw telh a ni miah lo. He lam hawia hmalakna teuh deuh ber chu rinawmna inzirtirna lam (moral reforms) hi ni a. Hei pawh hian corruption dona lam a hawitir theih tho a lawm kan ti a ni chuan thuhran ni se. Chuvangin, kan khawtlang tan thanmawhbawk leh buaipuiawm ber pakhat corruption chungchanga Synod a ngawi anga an ngai thin pawh hi a mak viau lo thei mai awm e.
Sual huat ngam loh corruption?:
Tun hma atangin sual kan sawi hian Mizote zingah zu hi sual lian leh kan do ber emaw tih turin kohhran pawh hian zu a do uar viau mai a. Zu chungchang hi Pulpit sermon-ah pawh kan sawi tam a ni fo. Zu hian sual kaihhnawih a ngah em avang hian do a hlawh viau pawh hi a mak hran lo. Hetih rual hian tun hma atang tawhin kohhran hi corruption chungchangah chuan a ngawi deuh tlat nia hriatna a lian viau mai. Eiru theite hi mi awm thei leh neinung deuh, kohhranah pawh tlatlum leh rawngbawltu thawhhlawk takte pawh an nih thin avang hian kohhran hian corruption dona lama hmalakna hi a nei lian tawk lo anga ngaih theih a ni. Tin, Upa leh Pastor zingah pawh hian Pulpit sermon-a curruption dona lam sawi hi hriat tur a vang viau mai. Revival Speaker te pawh hian an sawi tam ber chu a ni lovin a lang. Upa leh Pastor-te hian an neih phu lova hausa pawh an be chhe ngam lova puhna pawh a lian viau thin reng a ni. Zu zuar thawhlawm an pek kir thu te an sawi laiin eiru pawisa erawh tun thleng hian pek kir thawm hriat tur a la awm lo. Zu zuar te, zu in te man an tawhin kohhran hian an thunun thin a. Eiru erawh thiam loh changa jail bang zut meuh pawh hian tun thleng hian thunun tawk sawi tur an vang viau (ka hre tlem pawh a ni mahna). Tin, kohhran hian corruption hi a do chuan thawhlawmte pawh hi kiam deuh tura ngaihna chen a awm ve te pawh a ni mai thei. Kohhran hian corruption hi a do lo tawp a ni lova, mahse, tha pui thawhin, tih tak takin a la ti tawk lova hriatna a lian viau a ni. Zu a do ang leh mipat hmeichhiatna a huat ang hi chuan corruption hi a haw lo deuh emaw ni dawn ni.
Corruption dona tak tak kan hawi dawn ta em ni?
Kum 2022-a Synod Inkhawmpui vawi 99-na, Khatla kohhrana neihah khan corruption do kawnga hma lakna tura rawtna hi Presbytery pariat atangin a lut a. Chu thurel bawhzuina atan chuan Synod Social Front pawhin booklet ‘Corruption i do ang u’ tih an siam tawhte pawh ennawn a tihlen belh a ni a. Synod hian corruption chungchang hi a la thutak ta viau niin a lang a, Synod Social Front booklet tih len mai duhtawk lovin a umzuina lehkha a rawn siam leh ta ngat a ni. He Synod thuchhuahah hian Synod hian sorkar lama ngenna thehluh tur te, K|P, KPP leh Kohhran hmeichhiate bakah tualchhung kohhrante hmalak dan tur an ruahman thu te tarlan a ni. Inzirtir uar tura inngenna maia duhtawk lovin kut tling lova sum lakluh, sum thianghlim lo chu thawhlawma thawh tawh lo tura mipuite zirtir tur te, hlemhletna kawnga hming hliau te chu a theih chen chenah rawngbawlna kawnga hman loh te a rawn ti tel a ni.
He thuchhuah hi a tawi viau a, mahse awmze thui tak a nei kan ti thei awm e. Tun hma lama Synod-in corruption leh hlemhletna a do dan nen a danglamna lian tak kan hmu thei a ni. Tun hmain corruption dona lam booklet an siam bak a hranpa a thuchhuah siama umzuina hi an nei ngai lova. Thawhlawm chungchanga sum thianghlim hnawl ngam tur leh hetiang lama inhnamhnawihte rawngbawlna kawnga hmang lo tura tihna pawh hi hetianga tak chianga sawina awm chiah lo ni ngei tur a ni. An booklet-ah chuan hetiang lam erawh support vak lohna erawh hmuh tur a awm ve bawk. A hranpa liau liaua thuchhuah hmanga ngenna siam ngat phei chu a hranin an la chhuah chiah lo a ni awm e. Hei hian tun hma lam aiin Synod hian corruption hi a la thutakin, beih tak takin a bei chho dawn em maw ni le tih theih a ni a, a lawmawm tak zet a ni.
He corruption dona kawng hi tualchhung kohhran hian thawhlawm kiam pawh hlau miah lovin ti hlawhtling ngat se chuan kohhran hmelhmang hi chu a danglam dawrh theih a rinawm tlat a ni. Tin, K|P, KPP leh kohhran hmeichhia anga tih tur te pawh uluk taka kal pui ngei ni thei se, kan ramah hian corruption leh thil dik lo hi a kiam sawtin a rinawm. Tin, tunlaia social media lamah engemaw boruak hrang hrang leh hetiang kawnga inpuhmawhna hrang hrang awm laia Synod thuchhuah a lo chhuak hi mipuite hian thuchhuah hi an bengkhawn phah viauin a rinawm bawk.
Tunlai khawvelah kohhran duhkhawp lohna, khawvel thil ngaihnatna (materialism) lama kal nasa ta anga puhmawhna karah kohhranin corruption leh hlemhletna an do hi thil tul tak, kohhran mipuite, kohhran ngaihsak vak lo thleng hian an ngaihven thil a ni. Social media-ah hmalaknate tarlan zung zung a nih tak avang hian thuchhuah bawhzui kawngah pawh tun hma aiin awmzia a neih ngei a rinawm bawk. Rawngbawltu, Upa leh Pastor tam tak pawhin pulpit-ah huai takin helam hawi sermon pawh an sawi ngeiin a rinawm a. Hetianga corruption dona lam kohhran hian tih tak zeta a tih chhoh phawt chuan, mi tam tak rilruah chuan eiru chunga kohhrana inhmangte a ti tim ngei turah pawh ngai ila. Hei thuchhuah hi eiruk dona kawnga bung thar tha tak a ni kan ti thei ang awm e.
Mi tam tak chuan corruption kan sawi hian tute nge eiru a, tute nge eiru lo tih kan hre bawk si lova kan ti tehchawk a. A dik tak chuan khawtlang mite chu kan inhrechiang viau mai, mahni lakluh phu lova hausate chu kan hre vek a lawm le. Kan sum lakluh zat a thlip thlepin inhriatpui lo mah ila, an khawsak atangin eiru leh eiru lo hi chu kan hai lo. A ruka hausa thut hi chu thawhrimna piah leh dan piah lam hi a ni duh viau a ni. Chung kawngah kohhran committee te an duh fir ngam leh ngam loh athu a ni tawh mai a. Kohhrana inhmang tak pawh nise neih phu lova hausa chu mawhphurhna lianah kan dah loh ngam a tul tihna a nih ber chu. Corruption hi kan do duh tak tak chuan tihdan tur leh thiltih theih hi nasa takin a awm ngei a ni.
A dik tak chuan kohhran hian corruption a do hian chàn tur a nei viau lo. A nihna takah chuan Sorkar sum eiru te ngat phei chuan an eiruk hi thawhlawmah an thawh pawhin a rinawm lem loh. A chhan chu sorkar hnathawk hian hlawhbi mumal nei sa thlap an ni a, an hlawh zat kan hriat sakte an ni a, eiru pawh nise an eiruk sum hi an thawh ngam a rinawm chiah loh. Tin, corruption dona avangin thawhlawm te hi a lo tlem phah deuh ta pawh ni se kan ui tur a ni lovang, kohhran thawhlawm thianghlim zawk hmanga hnathawh hi van lam hian nasa leh zualin mal a sawm ngei in a rinawm zawk a ni. Chunglam hian a tam lam (quantity) aiin a takna (quality) lam a en zawk a. Kohhrana inhmangte pawh eiru leh hlemhle tak chunga inhmang te nen a infawmkem teuh ai hian tlem deuh rem rawm, ti tak tak te hian rawngbawl se tun ai hian kohhran rawngbawlna pawh hi a nung zawkin a rinawm.
Corruption dona kawnga chan tur lian ber chu Upa leh Pastor te thingpui inna a tlem phah deuh mai thei e tih zawng a ni e. Kohhranin mi thil neih kan chhawrte lah chu sawi tham tak tak a tling viau chuang lova, an tel lo hian rawngbawlna kawng hi pakhat mah a sukuk phah lo bawk ang. Corruption hi do ila, kan chan tur aiin kan hlawk puina hi a tam zawkin a rinawm tlat a ni. Tun ai hian kohhran hian corruption hi do na ngat se la, kohhran hlutna hi a sang leh sawt ang a, mi tam takin kohhranah rinna an nghat leh ngam ang a, kohhran thlarau lam nun pawh a kang sawt anga, thlarau bo leh nun tuihal zawkte pawhin kohhran hi an bel leh zual ngei ang. Chuvangin, Mizorama kan thanmawhbawk, khawtlang leh hnam hmelma, kan thlarau lam nun ti chhetu, corruption leh hlemhletna hi kohhran hian tun aia nasa hian do mawlh teh se. Hetia Synod-in corruption a dona hian rah tha chhuahin kohhran dangte pawh hian eiruk dona kawngah nasa leh zualin tan lak ve phah se a va lawmawm dawn em.